滙豐大班鄭海泉噚日去升格咗做大學嘅樹仁演講，鄭大班一向都好鍾意同後生仔接觸，不過，唔知係咪近排股市旺，居然有學生問大班攞炒股心得，又問個市係咪過熱，搞到鄭大班語重心長同佢哋講：「千祈唔好以為亁炒會發達，炒九次，第十次就輸突。」亁炒牛河華華就經常食，亁炒股市就好少聽，不過，相信係形容冇本錢，又落場炒嘅人。
果然，講吓講吓，鄭大班勸班年輕人唔好碌爆卡唔清卡數，佢仲話：「寧願滙豐賺少啲，都望同學每月清晒卡數。」嗱，華華一直都覺得滙豐係一家好嘅企業，你睇吓，堂堂亞太區主席，為咗明日棟樑，連賺少啲都肯。華華作為滙豐股東，都要企出嚟撐佢，雖然華華只係揸住雞碎咁多滙豐股票。
不過，點解講到炒股，鄭大班會咁激動呢？原來讀大學時，佢將借嚟嘅GrandLoan（政府學生貸款）攞去炒股、上堂睇股票機──呢個唔只係今日嘅大學生寫照，三十幾年前嘅鄭海泉亦係一個「學生散戶」，唔同嘅應該係，三十幾年前佢應該未有股票機啩。
學生問炒股貼士
至於當時鄭大班嘅炒股成績如何？大班話：「到73年輸晒。」講番噚日喺樹仁嘅演講，係以「香港金融地位前瞻」為題，不過好戲喺後面嘅學生提問，鄭海泉話完全感受到全民皆股，連大學生都炒埋一份。
啲學生嘅提問，或直線或曲線，但問嘅都係股市，鄭大班又嚟一番說教，再三叫學生要踏踏實實做人，千祈咪想搵快錢，仲教學生點理財，「畢咗業搵份工，儲吓錢先，跟住可以買啲穩陣嘅股票。投資股票肯定比放喺銀行好。」又同銀行倒米？未必，你可以喺銀行開股票戶口嘅。不過，滙豐好似喺今次股市風起雲湧時死機喎！
大班又好直率咁話：「當然有錢係快樂嘅泉源，但讀書時唔讀多啲歷史、天文、文化等書，培養氣魄，第日就冇機會，股票可以睇，金融應該知，但唔可以只顧炒。」佢希望學生唔好太功利，多啲關心社會。
跟住有大學生提到，唔少同學生啲信用卡碌到破產，鄭海泉話：「（銀行）唔應該畀咁高信用額啲學生。」原來佢都試過有同學碌爆卡搵佢求救，嗰位唔係好熟嘅校友將自己啲信用卡賬單交畀佢，「幾乎間間銀行嘅卡都有開，卡數搞唔掂，但我都幫唔到佢。」
[email protected]