藝人百足咁多爪，但又未必個個唱得。徐子珊前晚偕馬浚偉到澳門賭場登台，其表現震過貓王，走音程度由頭帶到尾，尤其她開騷時獻唱首支英文歌《LemonTree》，唱第一句已走音跳線，令賭客聽後酸過食檸檬，幸她懂得亡羊補牢，即場加料與馬仔大跳拿手辣身舞補鑊。
繼陳豪和廖碧兒、黃宗澤和胡杏兒先後到澳門登台演出後，前晚輪到徐子珊和馬浚偉接力，先後到金沙及威尼斯人賭場演出，但徐子珊跳得唔唱得，馬仔就唱得唔跳得，難怪二人要雙劍合璧，互補不足。
驚到騰騰震
徐子珊和馬仔前晚近7時抵澳門，9時到金沙開騷，現場約有60人圍觀，前者身穿閃片白背心襯黑裙先單拖出場，獻唱第一首歌曲《LemonTree》時，沒想到這位港姐冠軍的歌藝非常恐怖，開口唱第一句已甩key勁走音，滿面尷尬的她即時弄耳機轉移視線。其後她唱《好心分手》時同樣心情緊張，竟然全震音演繹，但其震音並非唱歌技巧，而是震過貓王的顫抖聲，連唱兩曲均令觀眾凍得打冷震。
有徐子珊這水兵獻技後，更顯緊接出場的馬仔歌藝超群，表演中段，二人齊請觀眾玩問答遊戲，向來跳得的徐子珊也連隨補鑊，與馬仔即場加料合跳拖手攬腰的辣身舞，伸腳勾住馬仔大髀，奈何後者舞姿生硬，如身鑲鐵板，令人忍俊不禁。
康仔遭柴台
前晚徐子珊共唱四首歌，但佔三首半都跳線走音，至11時她與馬仔轉往威尼斯人演出，她繼續走音走到底，絲毫未有大細超，幸兩場演出均氣氛不錯。
另一方面，蘇永康前晚也到該兩賭場表演，由於他唱慢歌多，初時氣氛較靜，後期才漸入佳境，其間兩名內地旅客甚不耐煩，在台下爆粗大叫「唱歌咁x難聽嘅？」有女觀眾則大聲鼓勵道：「你快啲返舞台啦！」康仔即說：「我已經返咗舞台啦，好快會有多啲好歌唱畀大家聽。」
採訪：林妃
