停咗牌超過3年嘅大凌集團（211），睇怕遲早會有嘢搞作，嗱，唔好以為華華學人做預言家，只係噚日華華見到大凌執行董事張浩宏，代表佢阿爸張志誠，捐咗100萬銀出嚟，幫助日前因為英國語文學校突然倒閉而失學嘅學生，完成PITMAN公開考試。
張志誠喺金融界有「大凌張」稱號，自從大凌集團喺04年停牌到𠵱家，佢都已經好耐冇蒲頭，反而近排佢個仔張浩宏就有同啲傳媒食吓飯，好落力咁幫公司復牌。先排就有15名大凌股東操去港交所（388），就大凌點解咁耐唔復牌，搵上市科主管韋思齊質詢。
今次玩捐錢睇怕都係想提高番啲知名度，之不過，今次捐助嘅受益人，係之前聲稱失去持續進修基金課程認可資格，突然結業嘅英國語文學校5000名失學學生。
只益五千失學生
班學生只要攞住「英國語文學校」嘅學費單，就可以免費去報讀尚華教育集團舉辦嘅函接課程，報考PITMAN。咁，尚華教育咪冇端端多咗班學生，大凌張呢招捐款都算刁鑽。