葉童演戲經驗十足，但扮醜角則十分少見，愛美向來是女人的天性，如今她大膽接受新嘗試，在新劇《奸人堅》中飾演哨牙妹，無懼破壞靚女形象，原來只想為大眾女性平反，兼打破戲劇傳統：「女主角唔一定要靚，日常生活行出街都唔係個個靚女啦。」
由黃子華、葉童及林嘉華主演的新劇《奸人堅》將於下周一首播，貴為今年無綫台慶劇，當然佔有極大優勢，今次葉童在劇中飾演凌玉翠，與「奸人堅」黃子華及「黃飛鴻」林嘉華有不少對手戲，不過她的角色並非美女，而是極盡嚇人的哨牙妹。
驚嚇造型老公怕怕
過往葉童鮮有扮演醜女，今次她接拍這個角色，原來是要為一眾女士爭一口氣，證明並非只有靚女角色才可突圍，她說：「好多時女演員角色都局限喺要青春貌美，街上都有人靚有人唔靚啦，唔通全部都係靚女咩？我覺得做女主角唔一定要靚，演員要放下包袱去投入角色先做到最好一面，今次我演呢個哨牙妹個造型好誇張，都擔心觀眾唔接受㗎。我試過返屋企戴住個哨牙，嚇到我老公咭咭笑，之後個工人見到都好驚嚇，證明係成功嘅，可以變咗另一個人。」
撐子華爆肚有道理
黃子華拍攝《奸人堅》期間，曾多次傳出他私自改劇本，對此葉童說：「佢改劇本係為角色同套劇，畀我感覺唔係有私心，佢只係改自己對白，冇改我嗰啲，拍攝嘅時候我會自動調整。」那麼過程中有否受到影響？葉童說：「我接受輕鬆喜劇形式，即場感受氣氛，當然我都尊重子華係一位成功嘅棟篤笑藝人，只係大家加入咗不同元素演繹，而我自己嘅造型已經係焦點，有一定分數。」
葉童自言希望今次扮演醜角獲得觀眾認同，以便證明女演員可有更多元化發展，毋須單靠外表，她說：「如果今次成功嘅大家都可以豁出去，我亦可以同一般大眾女人有個交代。」
採訪：卓寶花 攝影：仇志中
角色介紹：心地善良錯愛奸人堅
葉童在《奸人堅》中扮演凌玉翠，心地善良，不過因天生一副哨牙而感到自卑。玉翠從小到南洋工作幫補家計，10年後重返廣州，卻發現家中起了極大變化，弟弟雲階（彭冠期飾）投靠惡爺奸人堅（黃子華飾），妹妹玉碧（楊秀惠飾）則變得自閉。其後玉翠接受相親，對象是黃飛鴻（林嘉華飾），但她誤會對方是懦夫而拒婚，更被奸人堅欺騙感情，自此對男人失去信心。
宣傳爆笑：抄《警訊》玩飛鴿傳書
《奸人堅》貴為無綫台慶劇，宣傳片也落足心機，在其中一段宣傳片中，扮演黃飛鴻的林嘉華穿上長衫，模仿《警訊》片段，向市民報告奸人堅的犯案過程，又張貼奸人堅拼圖，然後說：「據目擊者透露，涉案男子身高五呎九吋，中等身材，長頭髮。」並呼籲市民以「飛鴿傳書」報料，最後抱拳誠懇地說一句「睇奸人堅，係醒目嘅」，爆笑指數爆燈。
至於另一段宣傳片則由葉童主演，講述她被巡捕盤問奸人堅的下落，葉童「死不開口」，並說「我怕一開口，你就叫我合番埋把口呀！」然後徐徐張開口，露出一副驚嚇哨牙，巡捕當堂反胃暈倒，同樣極富創意。
