噚日AXA公布「生活信心指數」調查，話喺亞洲8個市場總共搵咗2400個，年齡由25至50歲嘅市民訪問，香港方面就有300個代表，全部都係月入萬五以上嘅「富裕人士」。冇錯，係月入萬五蚊。雖然「富裕」，但調查顯示，佢哋對未來5年嘅生活前景，樂觀程度只得67.7，低過平均嘅71.6。梗係，空氣咁差，物價又越嚟越高，畀你都唔樂觀啦！
調查又話，大部份港人喺35歲就開始計劃退休，若果可以喺56歲退休，咁就verygood嘞！不過，講得樂觀程度「唔合格」，就梗係對生活唔放心，好似擔心養兒育女嘅問題，調查話只係得24%嘅人有為下一代儲教育基金；仲有人老就自然多病痛，家吓啲醫藥費咁貴，但只得一半人有買醫療保險；只係得27%嘅人係願意降低生活質素，達到提早退休嘅目的……
講嚟講去，總之樣樣都係錢，又好似真係好多人未為退休做好準備咁，所以個調查報告，最主要係叫大家及早為退休做準備，而最好嘅方法，就係搵人畀財務建議，搵邊個？唔使問華華喇啩，吓嘩！