恒基主席李兆基（四叔）一連兩晚豪花1,000萬元，為愛兒李家誠與徐子淇所生的孫女李晞彤擺慶祝出生80日的「發實宴」，爺爺李兆基昨日笑不攏嘴，講到明「金叵羅」孫女腳頭好，又謂相士指她是「觀音化身」，帶旺恒基升值上1,000億。至於現時重140磅的子淇則謂願意為李家六年抱四，為了BB即使再肥100磅也沒所謂。
千億新抱徐子淇與夫婿李家誠昨日在中環四季酒店，為出生80日的愛女李晞彤（Leanna）擺「發實宴」，一連兩晚大宴親朋，單是酒席就豪花500萬元，加上各式佈置及表演等，花費近1,000萬。
昨日發實宴擺了35圍，場地入口放置了主角Leanna的精靈大頭相及徐子淇一家三口的家庭照。子淇老爺、「亞洲股神」李兆基最早到，約6時20分坐黑色Benz到達，心情靚絕的他一開口便滔滔不絕，大講10分鐘股經。
吉時造人
「風水佬話係金叵羅」
提到小孫女Leanna似乎腳頭甚好，李兆基即眉開眼笑說：「係呀，風水佬話BB係觀音出世嘅時間製造，時辰八字都好好，係金叵羅，好多嘢都順風順利，仲帶旺公司過1,000億，佢係觀音化身之女。」會否送一億元戶口做大禮給BB？四叔說：「佢咁細個，遲啲先啦。個相士仲話，叫我唔好重男輕女，生女好過生仔，佢嘅命水好好，因為佢係觀音出世時間，希望佢將來多啲慧根啦。」
有指李兆基送了5,000萬珠寶給新抱徐子淇，他說：「送嘢好閒啫。」想她再追個孫仔嗎？李兆基說：「冇所謂，不過三年抱兩、六年抱四就最好喇。」去年李家誠和徐子淇結婚，李兆基向恒基員工每人派10,000元利是，問他今次有否再派利是，他笑說：「唔使喇！」
至8時15分左右，徐子淇與李家誠雙雙到場，但主角Leanna卻不在身邊，徐子淇身穿由鄭兆良設計的粉紅晚裝，戴上巨型鑽石頸鏈及鑽石戒指，貴氣幸福，可惜老公李家誠多次踩到她的裙腳。子淇一到場即甜笑合十說：「辛苦大家，BB瞓咗覺。」問她頸上可是老爺所贈的半億珠寶？她說：「唔係，係老爺結婚前送嘅，冇理由問幾多卡，值幾多錢。」
有福同享
女收億元阿媽齊花
問到BB是否真的在觀音出世時製造？子淇面紅笑說：「係咪？好開心生佢！有時抱住BB都會感動到喊，佢係上天送畀我嘅禮物，我同Martin（李家誠）未試過咁愛一個人，為佢付出咁多，Leanna為我哋帶嚟好多歡樂，我再肥多100磅，或多100條姙娠紋都冇所謂。」那愛老公還是愛BB更多？她說：「冇老公，就唔可以有BB，BB唔可以代替老公，BB係要嚟保護愛錫，老公就係互相支持，過一生嘅路。」她又謂願為李家「六年抱四」，但表示一切順其自然，生仔或生女也冇所謂，徐子淇說：「仔女最緊要健康、乖，大個做好人。」
問徐子淇可會將Leanna上契給觀音，李家誠表示沒考慮，至於送給子淇的IOU車牌，他表示非外傳的我愛你，李家誠說：「唔係，純粹因為字形好靚啫。」子淇更說：「香港市民放心，我係一個好小心嘅司機。」提到老爺指將來或送一億元戶口給孫女，問子淇分到幾多，她說：「唔使啦，借囡囡嘅一齊用，一家人唔使計較咁多。」
為善最樂
捐出賀禮救助孤兒
徐子淇又指昨晚發實宴以「SupperClub」做主題，志在與親朋食飯，她又說：「我父母、妹妹日日嚟探BB，送咗好多禮物，可以開一間BB舖，我哋想將啲禮物捐出嚟，因為Leanna已經好幸福。」又表示會捐出今晚收到的賀禮，但未決定受惠機構，她說：「想捐畀孤兒院，內地好多兒童無父無母好慘。」夫婦二人做完訪問後，又應要求溫馨互咀兩次。
此外，昨晚發實宴正式開始時，徐子淇及李家誠齊齊抱住BB在一曲《Myheartbelongstodaddy》伴奏下入場，之後由四叔致辭，場內三個巨型屏幕隨即播出一家三口的溫馨幻燈片，當中包括子淇與李家誠從拍拖、結婚到懷孕時的生活片段。
採訪：梁錦雯、顏英儀
攝影：林德雄、葉君海、娛樂突發組
相士話：前世積德與佛有緣
徐子淇今年7月17日為李家誠誕下囡囡李晞彤，李兆基指孫女是觀音化身，記者昨日致電相士區仲德了解，他說：「係有呢樣嘢，前三世種下嘅因果，都會帶到嚟今世，即係話如果前世做得多功德事，今世可以轉投有錢人家。至於徐子淇女兒命格屬水，前世應該係屬火，為人比較仗義疏財，應該積落唔少功德。」相士黃震宇則說：「喺玄學角度嚟講，好少講呢樣嘢，至多係話同觀音神佛有緣份。」
至於何謂發實宴，區仲德說：「一般人多數會擺滿月酒，不過都有人擺發實宴。數理上，80係一個吉數，係吉祥嘅嘢，發實宴係用嚟冲旺，等BB仔健康生活，壽命長啲。」
話你知：鄭兆良設計水晶裙
徐子淇昨晚所穿的母女裝，分別由「名媛設計師」鄭兆良及何國鉦（DorianHo）設計。出自鄭兆良之手的粉紅色絲絹晚裝，用上9米粉紅色的DuchesseSatin製作，內加珍珠灰色襯裏作對比，裙上鑲滿5種有細微色差的Swarovski水晶，突顯法國真絲的閃爍光芒。此晚裝採用斜角包領的超低胸設計，以突出由老爺李兆基所贈的名貴頸鏈。
Dorian則為子淇設計了另一襲象牙白法國喱士EmpireCut低胸長裙，上身鑲上閃爍的Swarovski水晶石，有歐洲貴族風采特色，跟子淇千億新抱的身份十分脗合。
