本周末只得兩場英超，無得揀的你可能會疑惑阿士東維拉對韋斯咸有乜好睇？咁，就要由小弟來一個久違的「英超kickoff」了。
本來，維拉這一支中部球隊，無甚性格不高不低，憎佢唔落，愛佢亦唔會，只是當我一想到他那藥棗紅色的主場球衣就激氣，皆因一般球迷總是分不清誰是維拉誰是韋斯咸，前陣子還看見有報章登錯相，激氣。
要小心講「李奧曲卡」
周末睇波，你更容易搞錯，上季兩大韋斯咸性格人物已經倒轉槍頭，名字如雷貫耳的是李奧曲卡，評述的同事們每次提到他總是小心翼翼，廢事誤講粗話。
李奧曲卡有性格，還記得去年他正是韋斯咸隊長，但卻一直不被球迷認同，還將去季成績低落歸咎於他。結果搞到他在對曼聯一役入波致勝，都不識得笑，非常抑壓。
另一性格前鋒希活，放佢走亦是韋斯咸敗筆，雖然他入波能力不高，但其個子高膊頭寬，在前線保護皮球功力一流，加上他身形巨，但樣子可愛，尤其被人侵犯後的苦瓜亁表情，非常博到球證同情，又可惜上輪他後備上陣，卻唔覺意輸了個12碼，搞到維拉由贏變和；賽後維拉球迷討伐之聲不絕，本地報章亦有戲稱他為儍鋒，慘！
只看兩位悲劇人物倒戈，就已經夠吸引。我相信就算多平凡，總有做主角時候，我希望李奧曲卡及希活有波入，但韋斯咸最後贏5:4。
馬啓仁