上星期小弟推介認真欠運，3關全部爭1球，貼維京同薩拉戈薩贏3:1同2:1，佢哋走去贏3:0同2:0，貼羅斯托克和2:2，佢哋又以2:1贏波，本來40蚊博1皮嘢，結果都係搞唔掂。
收拾心情今周攞70蚊再嚟過，先取兩關法甲場次；周六巴黎聖日耳門主場對雷恩，聖日耳門呢支衰波其實幾易捉路，佢主場就買佢對家，佢作客就要捧場。聖日耳門至今主場未贏波，反而作客兩連勝，問你怕未？對手雷恩今季明顯有心爭聯賽前列，有韋托特、比捷斯呢啲老鬼壓陣，拜恩特亦捧為法國新希望；佢哋已經作客贏過歐塞爾同羅連安特，表現對辦，今次博冷取雷恩贏2:0波膽。
再博精英隊3:3波膽
里昂呢班兵今季又走咗多位球星，講真踢歐聯已經勉強，好在喺番國內仍然超晒班，歐聯連輸兩仗，里昂高層都似叠埋心水爭聯賽7連霸好過。暫列聯賽第1嘅里昂，周日就作客第3位的波爾多，屬今周最強戲碼；以里昂上季遇強越強表現，贏波可期，博里昂贏2:1呢個熱門波膽啦。
冷膽向荷甲弱旅對碰埋手，精英隊主場對奈梅亨，精英隊上仗可以落後3球，最終迫和洛達3:3；奈梅亨又唔係好料，作客3場輸晒，冷冷地博兩軍毫無保留鬥攻，再開3:3波膽。
文：牽牛
貼士
波膽過關3串7
星期六51雷恩勝2:0（12倍）x
星期六55精英隊和3:3（50倍）x
星期日45里昂勝2:1（11倍）
全中賠率：7,955倍