馮仁昭四圍超
亞姐學詠春辣招　3號楊琇雯防狼拳舂鎖骨 - 馮仁昭

亞視早前買咗洪金寶、元彪、謝霆鋒同李彩華主演嘅電視劇《詠春》，下禮拜一就播映，噚日亞視喺總台開記者會，但劇中演員全部缺席，惟有搵應屆23位候選亞姐撐場，詠春師傅梁國華仲教一班亞姐防狼術。
一班靚女睇師傅示範時，不停嘩嘩聲讚勁，唔知係咪佢哋顧住睇唔記得學，到真正落場時個個都雞手鴨腳，當中3號楊琇雯最賣力，但就錯手打中4號張海燕嘅鎖骨，嚟自日本嘅15號美香子示範被人從後箍頸時，就突然驚叫。

指效果逼真

張海燕話事前冇夾定點打，仲完全唔介意被打親，反而覺得效果逼真。美香子就解釋尖叫係因為對手突如其來箍頸，令佢覺得好似真係受襲咁，佢又話讀書時學過空手道，但都想學多啲功夫防狼。
擁有驕人身材嘅7號戴安妮話好彩未被輕薄過，但就好開心有機會學番兩招功夫。