近日德國慕尼黑上空冒起一團白色泡沫，睇真啲原來係啤酒泡！按照德國傳統，9月22日至10月6日係著名嘅啤酒節。喺一片「亁杯」聲之中，我哋睇到東尼、列貝利、高路斯同轉咗會嘅馬卡爾……咦，竟然仲見到波歷克。
英國《太陽報》周三圖文並茂，揭露波歷克嘅「惡行」；呢位報稱養緊傷嘅球星，唔理球隊七國咁亂，又唔去為球隊出戰歐聯打氣，竟然同老婆絲蒙妮返鄉下咕嚕！
逃兵波歷克笑得再燦爛，都不及今季表現反彈嘅拜仁慕尼黑職球員。首次着上巴伐利亞傳統服裝嘅東尼同列貝利，拖住老婆一齊出席固然興奮；主席路明尼加、主將舒韋恩史廸加等亦越飲越High；無嘢嘅，球隊成績咁好，借節日慶祝一番絕對合情合理！
多蒙特輸波得個睇字
啤酒同節日都係屬於勝利者嘅！好似另一支德甲球隊多蒙特聯賽3連敗後，教練杜爾禁止球員參加啤酒節，周一仲帶球員去森林跑咗45分鐘越野跑，周二就去波蘭踢友誼賽，周三回國繼續操冇得唞！
見到未呀，波歷克！作為一名職業球員，每個禮拜收緊車仔12萬鎊（約190萬港元）人工，就算唔出得場都要到場打氣啦！隊友喺場上搏命，你就嘻嘻哈哈一杯接一杯，有冇職業道德㗎?