車路士老闆阿巴莫然域治送走摩連奴後，換上樣子有幾分奸險嘅新領隊格蘭，周三又傳出阿積士教練坦卡特將出任足球總監個位，呢位人兄同樣外表亦似乎頗凶殘。「車仔」有呢兩位惡人睇門口，相信成績好快有改善。
大家唔知呢個坦卡特係乜水？有冇印象早兩年睇巴塞隆拿比賽時，後備席上總有個助教，仲肉緊過教練列卡特，成日走出場邊向球員提場，個樣又同江湖味濃厚嘅本地演員，即係同股票市場「四叔」同名嘅「基哥」李兆基十足十，咪就係呢位坦先生囉。小道消息話，喺兩年前當巴塞喺歐聯迎戰「車仔」時，坦卡特就因為覺得摩連奴太寸，喺球員通道伸咗摩連奴一腳，都咪話唔惡。
兩大惡人看門口
據講，「車仔」個「司機位」一開為二之後，惡人1號格蘭負責應付傳媒，惡人2號坦卡特就將會負責戰術同操練，咁即係話格蘭正式坐埋一邊啦！又難怪嘅，巴塞06年奪得歐聯冠軍，坦卡特係教練列卡特嘅智囊，阿巴想攞歐聯冠軍想到癲咗，當然暫時會當佢神咁拜！
呢個格蘭又係天生黑仔命，阿巴之前明明畀位佢上，點知自己又冇教練牌。之後球隊成績一直唔好，卒之等到前晚歐聯2:1擊敗華倫西亞，諗住返史丹福橋同阿巴領功，竟然門口都未入就傳來坦卡特可能入主嘅消息，仲唔當堂謝晒？
話時話，「基哥」同坦卡特個款越睇越似，你話呢期「基哥」如果喺倫敦史丹福橋嗰頭出現，隨時畀當地「車迷」認錯都唔出奇噃。不過，我求大俠就勸「基哥」等「車仔」成績好番先去，如果唔係啲球迷飲醉，當佢係坦卡特咁打一身，就唔好啦！