劇集《舞動全城》開播前後，網民一矢中的：「睇戲睇黎耀祥，睇身材睇陳法拉廖碧兒」。演技？舞姿？觀眾似乎志不在此。報道焦點都集中在兩位女主角爭仔（陳豪）以及惡鬥連場的傳聞上，女人的戰爭好睇過王賢誌喪寸崔建邦。自上位以來是非不絕，法拉對此說：「我覺得佢同陳豪好襯，我同碧兒都相處到、好好傾，佢仲教我跳舞，點解一定要話我哋不和？」
陳法拉在《舞動全城》中飾演跳舞導師，不乏大型舞蹈場面，其中一場10多對男女一起跳舞，既講求合拍又要有美感，拍了一整天，法拉笑言脫鞋後兩腳傷痕纍纍。至於舞伴黃長興，她笑道：「佢都好合作，成日拉住我排練，好勤力，不過有時都會踩到我囉。」
讚死敵跳舞勁
自小隨母習中國舞的法拉，身段柔軟，即使在劇中改跳現代舞、拉丁舞一樣難不倒她，教人意外的是原來劇中死敵、現實中的「所謂情敵」廖碧兒也曾親自教路，法拉說：「我同佢喺套劇裏面一碰頭就鬧交，一係就鬥跳舞。Bernice（廖碧兒）跳舞好叻，佢真係跳舞出身，動作好sharp好有力，所以有時都會教吓我。」
法拉所演的舞蹈學校太子女性格硬頸好勝，首集便因不忿被新聘的導師廖碧兒搶風頭，故邀約比舞分高下，更使橫腿欲勾跌對方。劇外有關法拉的傳聞一如其角色極富攻擊性，包括狂電碧兒男友陳豪、性感博搶鏡等。法拉笑道：「我覺得陳豪同Bernice好襯喎。」又謂：「我同Bernice都係講英文，好好傾，合作嗰陣真係一啲尷尬都冇。我中文好過佢，所以佢成日攞住本雜誌嚟問我：『呢段報道又講我啲乜嘢呀？』點解一定要話我哋不和？」
跟華姐較熟絡
一個教跳舞一個做解畫，似乎真是和睦。早前有報道指法拉被孤立，單聽剛才當事人剖白，表面證供不成立。問她在圈中知己有幾人？法拉說：「我同班華姐比較熟，好似李亞男、鍾嘉欣、楊秀惠咁，始終我係華姐出身，大家同聲同氣。」
那麼其他當家花旦如胡杏兒和佘詩曼呢？法拉說：「咁係因為我哋未有機會合作啫，可能你見到有啲人開工成日講笑，但咁係咪真係代表好friend？如果你問我同邊個男藝員比較傾得埋，又會話我同邊個邊個有緋聞，𠵱家一男一女食餐飯都要搵個中間人避嫌，已經冇晒正常社交！」
採訪：吳佩思
攝影：林德雄
服裝：SistyrMoon
