已故民建聯主席馬力中文大學中文系同班同學高繼標喺今年七月出版咗一本《羅德丞政海浮沉錄》，寫出佢追隨羅德丞工作九年多之所見所聞。此書出版前，適逢書展，但出版商「博益」（《南華早報》附屬公司）冇大力宣傳，冇大力推銷，更有人講，此書初版，只係印咗一千本，顯然係出版商並不睇好此書銷路。
半個月前，左丁山在中環三聯書店買咗一本，見有馬力死前寫序，作者高繼標又以此書「送給摯愛的女兒荻菲，父於困乏中寫成此書，以此勗勉。」不禁感動咗幾分鐘。馬力心懷故人，高繼標在中大讀書時或者聽過錢穆先生所寫之新亞校歌裏有兩句：「艱險我奮進，困乏我多情。」佢移民加拿大，在困乏中寫成《羅德丞》，大家睇吓內容，就知道局外讀書人跟隨豪門多年，有幾大嘅諷刺性。
博益啲編輯可能走眼咯，唔盡早為《羅德丞》宣傳。左丁山等到中秋假期先至睇，一睇就嚇咗一驚，呢位高先生幾多私人內幕爆噃，如果佢識得早將呢啲材料先在周刊分期連載，最後結集成書，一定可以收到更多稿費，稍減佢之「困乏」。
此書講到，鍾士元要求尤德踢走羅德丞，梁振英幕後供藥轟羅康瑞，羅德丞冷待、質問林行止，如何設立一會兩局，姬鵬飛與羅德丞夫婦搞「麻將內交」，搗亂新機場計劃，辦Window蝕大本令江澤民不滿，利用李福善參選特首阻撓董建華等等，揭露九七前後忽然愛國派內之爾虞我詐，搵國家錢，以及豪門爭相與中方拉關係之嘴臉。最令左丁山驚奇嘅，係高繼標痛批《信報》專欄作家張立，指張立登門自薦，賣弄政治見識，俾陶傑及韓中旋批評，又話黃霑胡亂出招，敲李福善一百萬，黃宜弘梁鳳儀對羅德丞人情冷暖，孫明揚係羅府常客（打麻雀），劉漢銓為人等等，可以話係講盡眾生相，商界人物搞政治，始終離不開面子與利益的糾纏。香港政壇人物，不分左右，政治記者，不論老嫩，如果唔讀吓呢本《羅德丞》，一定係條大懶蛇。