劉德華將於12月21日開始舉行一連12場演唱會，由於信用卡優先訂票、內部認購均已爆滿，得到歌迷支持華仔當然很開心，但他近日為了撲飛的問題，幾乎和父親反面，甚至連朋友的電話都不敢聽。華仔公司的員工，打算在公開發售時去排隊，幫他買飛給家人和朋友。
剛度過46歲生日的劉德華目前正在小休，兩日後再飛去哈爾濱繼續其中國巡迴演唱會，華仔將於今年12月21日至08年1月1日在紅館舉行「劉德華WonderfulWorld演唱會」，日前AIG信用卡的優先訂票，12場最貴的480元和300元門票在半日內售清，內部認購更誇張，上月初已超額五倍，華仔近日因為親友撲飛問題十分頭痛，在中秋節晚上更因此幾乎和父親嗌交。
希望林建岳識做
華仔說:「我心情好複雜，好開心自己嘅演唱會有咁多人支持，但唔夠飛應付朋友同家人嘅要求，都唔知點算，最近我連電話都唔敢聽，朋友打嚟唔係訂10張8張，係100張、甚至1,000張咁訂，我點會有咁多飛？連我爸爸都幾乎同我反面，我同阿爸講，『演唱會係我唱，不過唔係我主辦呀老竇，我都話唔到事㗎』，希望林建岳先生睇到我咁講，自己識做再畀多啲飛我啦！唔係搞到我日日家嘈屋閉，都唔知點算。」
歌迷排隊兩星期
華仔歌迷會的演唱會門票當然也供不應求，華仔說：「聽講佢哋組織咗隊伍，公開發售前兩個禮拜就去排隊，我聽到都嚇呆，叫佢哋唔好咁緊張，但佢哋唔肯聽。我公司嘅員工個個都好愁，因為接訂飛電話接到手軟，訂唔到就俾人鬧，佢哋都諗住等公開發售時出去排隊，幫我買飛畀我啲家人同朋友。」
這次華仔演唱會海報上，華仔戴了一枚閃閃生輝的鑽戒，是贊助商用演唱會logo設計所成，價值六位數字，華仔笑說：「我咁大個仔未試過戴咁大隻鑽戒，哈哈！」
撰文：林妃
