在香港，日本銀器品牌絕無僅有。早年GORO'S和JamHomemade猛龍過江，引起過一陣小旋風，可惜後繼無人，日牌銀器風未成氣候。最近，以太陽為標記的日本銀器品牌FIRST-ARROW'S漸漸冒起，品牌成立只有短短十年，近日已在原宿開分店，還乘勢正式襲港，名副其實向香港發出第一箭！
記者：葉雪芯
攝影：楊錦文
獨有太陽印記
首次登陸，FIRST-ARROW'S（簡稱F.A's）創辦人兼設計師伊藤一也特地親身來到香港。F.A's以印第安風格設計，以印第安文化為創作概念，主題多以太陽、弓箭、羽毛、動物爪等為主。別看伊藤只有33歲，原來他已經算是老行尊，從事製造銀器已經二十多年：「我14歲已經跟一個銀器師傅學師，佢對銀器好有研究，當時經常同我講一些印第安文化的事，聽完我覺得好有生命力，所以決定以後做銀器。現在我的設計，都以印第安文化象徵做主題，弓箭則表示追求優良和幸運，而太陽印記是我們的獨有標誌，是指引發人類的力量咁解。」
自己戴兩年先賣
日本人幾時都係咁認真。要做靚銀器，更必須堅持以人手逐件打造。FIRST-ARROW'S整個品牌，計埋創辦人伊藤只有4個人，但全店的銀器，由設計到生產，均由4人一手一腳做出來，全人手製造造工一樣好細緻。雖然單睇價錢，都算幾貴，但貴得有道理。一般的銀器，多以925銀製造，但伊藤則選用了精純的950純銀製作，即95%銀，加5%銅，質地較堅硬，所以可容許更仔細的手工。F.A's每個款式均由4人親自戴上起碼兩年才會推出市面，伊藤說：「我哋要自己親自戴過，感覺到有朝氣、有正能量，先會製造出來售賣。而且每件都由自己親手製造，有感情好多，拎上手感受都唔同啲。」
特別配方銀特別快黑
眼見他們手上所戴的銀器已經發黑，究竟係咪有問題先？伊藤解釋：「咁就錯晒喇！F.A's的銀物料是有晒保證書的。印第安風格正正就是要有點殘舊Feel，一般的銀不容易營造呢種風格，即使日日戴都做唔到Vintage效果。我哋用上特別配方，經人手戴上約一年後會變黑，若然不喜歡，只要用抹銀布一抹就有番光澤，對銀器無損。」對於銀器的保養，伊藤說不用特別打理，他自己連冲凉都不會把鏈子脫下來，就咁戴咗十年，花紋圖案一樣好清楚，仲有陳舊感。
上月原宿開新店
純人手打造的新進銀器品牌FIRST-ARROW'S，除了進軍香港，更剛於上月於原宿開設分店，裝修比原有的吉祥寺本店更有原始印第安風格，銀器工場亦設於店內，𠵱家即刻帶你睇！
兩兄弟拍住上
F.A's的工匠、設計師加埋創辦人，十年來都只有4人，伊藤說，品牌初成立時，因為人手問題，幾乎是零宣傳。早期靠派傳單，再由熟朋友幫襯，之後就一傳十、十傳百，由口碑做起，𠵱家開分店仲打入香港，都咪話唔厲害。4人中，一人是伊藤的弟弟，下月將會推出由他設計的RockStyle系列。弟弟今年只有29歲：「細細個睇住哥哥去學師，佢返到屋企又繼續用鉗去做手鏈，覺得佢刻啲圖案好Cool，我就暗暗偷師，𠵱家仲有機會出自己的設計，希望兩兄弟可以一齊搞好個牌子。今日第一次衝出日本，有機會將品牌推廣到嚟香港，哥哥要來，今次我當然跟住嚟！」
查詢：Take5（23755731）
地址：尖沙嘴加連威老道75號一樓