噚日港股低開後，好快就嘭嘭聲升番，再創歷史新高，唔少散戶都諗住後市一片好景；點知晏晝突然掉頭急插，收市倒跌719點，單日波幅1600點有多。華華喺網上討論區見到啲網友呱呱嘈。
Logsies話：「今日絕對係8月17日大奇迹日嘅『反』版。」靚女將個「DeepV」180度反轉咗，咁咪衰過着樽領衫！Spring0702888都話：「個感覺簡直係坐緊過山車。」Winter8888就話：「間唔中都要坐過山車，練吓大膽。」
雖然恒指跌咁多，但網友估過幾日，股神李四叔可能會出嚟話：「我趁低位掃貨。」所以唔少網友冇有怕，Faifai14話：「前排升到『shortshort哋』，今日回番幾百點，好正常啫。」Revive亦話：「同胞大把銀，一定射住我哋嘅。」
講開四叔，前排佢老人家先至話股市年底見3萬，之後何賭神「大」佢話今個月底就見3萬，難怪皇帝出巡話：「大市冇咁快到頂，想跌都要問過四叔先啦！」Lamimi就諗：「先放咗啲一手黨新股，留番啲彈藥，等再跌多啲轉買強勢股，後市仍然睇好，目標3萬點維持不變！」
不過保守嘅散戶就先行跳車，忍俠老曲話：「頭先走咗幾隻賺咗嘅實力股，寧願賺少啲好過倒輸。」E愛情次按基金就賴幽默話：「俗語謂不時不食，10月最時令係乜，梗係陽澄湖大閘蟹啦！」
[email protected]