【講波名人館（之七）】「有今生，冇來世！」、「蔗渣嘅價錢，但踢出燒鵝嘅味道！」、「準備不足，尤如準備失敗！」能夠講得出這些教球迷「噴飯」金句的講波佬，只有一個黃興桂！無論閣下認為Peter黃講波時廢話連篇抑或妙語連珠，其別樹一幟的評述風格在球壇可謂家喻戶曉。在訪問中，我們再為他選了3句金句。記者：曾雁平 攝影：黃耀興 部份圖片由黃興桂提供
金句1
「你可以挖苦我，但唔可以話我唔識波。」
「我知道互聯網上流傳我的足球語錄，又有很多球迷不時挖苦我。」Peter稱。「但也有很多球迷欣賞我，像每次回港總有球迷主動同我傾波經，證明還是有很多球迷喜歡我，多謝他們的欣賞。至於經常挖苦我的球迷，我也無所謂，因為我的講波風格是得到很多同行，如Keyman的認同，他們經常叫我，不必要理會那些閒言，繼續做好本份。」
Peter續說：「我5歲開始睇波，曾是美國運動癡，又做過職業教練，看過很多名人著作，你總不能說我唔識體育及足球，又或者我的說話沒有意思，可能是球迷沒有深思語言後的意思。」
金句2
「講球員同球隊嘅英文，大家先知道正確讀音。」
Peter坦言，曾有球迷寫信到電視台投訴他經常講英文，故近季已減少在節目中講球員及球隊的英文名，評述上也較以往收斂，但他不認為是妥協，只是不想因某些人而失去繼續為球迷評述的機會。
「我在節目中講球員及球隊的英文名，因為有些法國及西班牙球員的中文譯名，與真正的發音有好大分別，所以才講英文令大家知道正確讀音，有球迷不認同，那便減少，但就不會完全不講。我鍾意講波，又可搵到食，講少兩句英文沒有甚麼大不了，如因此令自己冇得撈則太不值。」
金句3
「我中文麻麻，講波時加入些金句可以更傳神。」
Peter部份金句或語錄是有邏輯根據，像龍門最好朋友是門柱、好波不妨一睇再睇等，至於那些加利仔有3個缺點的金句，則純粹是希望加重語氣及幽默感，搞些氣氛，從而令球迷看得更過癮。
他說：「我在美國讀書，慣了用英文表達，所以中文麻麻，評述有時未必可以真正表達到心想的意思。至於金句及語錄則是有心加插，當然不會是亂加，我也只會在適當時間講番幾句。其實我只是想將過去幾十年在足球及體育比賽中所學到的體育思維與球迷分享，其餘則是營造輕鬆及幽默氣氛，至於球迷是否接受，我不會太介懷。」
後記
63歲的Peter自言，從未想過退休，只要有能力都會繼續講下去，也樂意不時港、星兩邊走，閒時回港與好友飯局，踢番場衞生波，但還有心願未了：「我其實很想同Keyman合作講波，希望不久的將來可以與他合作。」
Peter黃10大金句
1〉加利仔有3大缺點，冇速度，唔夠快，跑得慢！
2〉12碼呢樣嘢呢，一係入，一係就唔入。
3〉蔗渣嘅價錢，但踢出燒鵝嘅味道！
4〉龍門最好嘅朋友係邊個呀？咪龍門柱囉。
5〉今場波邊隊能夠入一粒先，嗰隊就會有優勢！
6〉有今生，冇來世！
7〉呢場比賽，我只可以用一個字來形容，「精采」！
8〉好波不妨一睇再睇場波！
9〉射罰球，最緊要唔好射高同埋射斜。
10〉呢球波一係入，一係龍門救到，一係出界。
排名不分先後
Peter大事件
44年：出生
59年：父親被綁架及撕票
63年：赴美升學
73年：回港
74年：展開教練生涯，執教陳維周紀念中學
80年：執教甲組球會東方，首季即奪總督盃
81年：捧銀牌冠軍
82年：執教南華，太太在美國遇空難去世
83年：南華成績欠佳，宣佈辭職
84年：執教荃灣
88年：重返東方
90年：移民美國
95至今年：到新加坡擔任ESPN體育評述員
簡介：黃興桂是本地富商黃應求的長子，5歲已隨父親到大球場觀看本地足球，而其父於59年遭綁架，後還遭綁匪撕票（即轟動一時的3狼案）。只有15歲的Peter遭逢巨變後，在63年到美國升學，開始迷上美式運動。73年回港後Peter向教練工作發展，先執教陳維周紀念中學，5年內帶領學校成為全港足球及籃球冠軍。82年任教南華，可惜季中因戰績差劣而辭職，同年，結婚5年的太太在美國旅遊時不幸遇上空難去世；84年轉投荃灣執教，88年重返東方，主要培訓潘嘉明、譚兆偉、羅繼華等剛從體院畢業的青年足球精英成才。
黃興桂檔案
別名：Peter、皮蛋黃
年齡：63歲
現職：ESPN體育評述員
教練資格：國際足協高級教練牌照
網友有Say
小糕：「越來越愛peter黃喇，佢可以將一個爛gag演繹得更爛，將爛gag發揮到淋漓盡致，聽佢講波真係好開心。」
rays：「場場都九唔搭八，都唔知點學人講波，又成日講錯野；一樣嘢重覆講十幾廿次，唔識講咪學人講。」
loklazy：「桂神唔錯呀！好過只係讀數據。雖然佢係成日亂講野，又咩有今生冇來世，神奇、頂級、超卓；但係全部發自內心，好過淨係讀數據好多啦。」
鋒：「佢擔任ESPN評述員，折磨本地數以百萬計球迷耳朵多年。傳來他講波時的『金句』，不妨細心閱讀，保證你話：點解講咁多廢話，仲有得𢭃人工繼續講？」
