去年，澳門的博彩業收入達550億！
賭仔深信「一命二運三風水」，人哋以賭起家，但多數人就敗咗頭家，皆因你生得唔及八両金咁奇形怪相囉！今次李丞責同陳子才師傅唔講生肖吉凶，先教你睇賭仔最佳面相，仲毫不吝嗇教你攻破賭場風水陣，搵出最易贏大錢的賭場，再以過來人身份暢談賭場必殺技，實屬難得！各位賭仔入場搏殺前，記緊Check真喇！
記者：盧家蕙 攝影：陳盛臣
插圖：PuiyinWu Model：Hibernia、Louis
第一招：攻破風水陣
澳門最受歡迎的大型賭場風水格局大有來頭，要贏大錢，淨係有運都唔夠頑強，所以要分析埋賭場形勢，捨難取易，經李丞責師傅分析及實戰後，終於算出邊間最旺賭仔的「派錢」賭場，要挑戰難度都一樣有計！
最易得米賭場
永利財氣不設防
雖然永利的外形十足一把刀，好似煞氣好大，加埋盞紅吊燈，唔少賭仔都認為好邪！但有晒實戰經驗的師傅劈頭第一句就直指：「永利好易贏錢！」他認為這裏沒有風水格局擋住財氣，贏佢嘅錢的確好Easy。
星際風水擺設少
由型男梁朝偉做代言人的星際酒店，設計簡約，外形古怪有如積木，睇落已經唔多夠殺，加埋師傅認為呢度風水擺設少，派彩肯定都爽手！
最難贏錢賭場
新舊葡京易令人迷失
這間最高難度，「鼠吊金籠」的格局，外形似雀籠，屬雞人士避之則吉。設計上具陰柔條件，入夜去賭多數輸錢。場內的圓形賭檯、變色巨蛋等圓形物件容易令人迷失方向，變得冇主張，決斷力同時間觀念都降低。
拆招秘技：
＊屬馬、狗、龍的人比較有利。
＊賭場動土時會自破風水，賭仔贏錢有望。
＊見樓上的貴賓枱荷官企邊，在樓下普通席的你記住死跟，最有氣勢的位置就在此！
金沙周身唔自在
金沙場內佈滿猶太及印度風水設計的「天眼」，即眼形飾物，感覺好似被人監視緊，周身唔自在。不過師傅就試過坐最近廁所位的賭枱，以奇招取勝，跟荷官打對正坐，最後奇招果然出勝：「我朋友話去Toilet，幾分鐘我就贏左十幾萬，之後即走。」
拆招秘技：
＊最利熱氣人士，多穿鮮艷顏色衣物。
＊見有人越賭越躁，記住黐住佢下相反注。
＊剋冬天出生的人，避之則吉。
＊格食格增氣勢，你手長腳長，就要搵個圓碌碌荷官。
威尼斯人擺明吸水格
由於師傅尚未去玩番轉，唔可以提供實戰經驗，只知它明顯以「水」為局：「以水鄉為名，加上條運河，比其他賭場嘅噴水池更多水！對酒店非常有利，賭仔要小心。」川流不息的運河，有利吸亁賭仔荷包入邊的「水」，仲要係源源不絕嗰隻。
拆招秘技：
＊趁有噴火、雜耍、勁歌熱舞等表演時下注，熱熱鬧鬧，賭仔最為有利！
第二招：自我審查
行衰運有樣睇，話知你係賭神，氣色唔好一樣輸到失魂！天生樣衰就更加唔好賭得咁認真。先來看看兩位大師的面相分析，自我審查，才決定有無本事瞓身搏殺！
樣衰易發達
睇面相就知有冇賭運？李師傅就好搞笑咁講：「集齊以下條件的人，講真會幾樣衰，你睇八両金就中晒咁滯，佢曾經好風光，不過留唔住啲財啫！」
鼻頭生瘡輸到仆
研究完易發財長相，陳子才師傅就教你睇破財格，師傅說：「見到合乎以下特徵的人，記住吊實佢，佢買大時你買細，就有着數。」
第三招：佩戴飾物催財氣
眼見咁多人戴晒成抽飾物入賭場，係咪真係work？綜合大師之言，原來幫助不大！不過李師傅都贈咗大家幾句，睇實喇！
金器：可消減多餘的負能量，可以應急，睇得又押得。
銀器：因氧化性高，功效不大，不過有樣好，可以壓驚，膽細者最啱。
水晶：李師傅話其實水晶作用不大，真係要靠佢催運，戴黃水晶啦！
玉珮：一定要揀黃玉，不過聽聞靚貨、正貨難搵又好貴！
08年中港澳大運
陳子才師傅自言不鼓勵賭博，所以佢本人一次賭場都未入過，不過佢就測咗08年的中港澳大運，再記住西南面係財位，靠投資一樣有得執。
港人宜買人民幣債券
香港跟住祖國好，不過資金就湧晒入中國，所以投機者買人民幣債券係明智之選，香港嚟緊個市都仲係向好！水為財，但維港海岸線就越填越直，所謂「直水無情」，香港人係好易執到金，不過人格就變得無情，錢來得快，去得也快！
西灣及氹仔樓必升
食正偏財位（西南面）的澳門賭業繼續暢旺，樓市向好，記住有水環繞的地方就升得起，例如新口岸、南灣、西灣及氹仔，必升！