許志安噚日擔任《志雲飯局》嘉賓，事前佢已經有心理準備會被問到有關同鄭秀文（Sammi）嘅一段情，但安仔喺接受記者訪問時，旁邊嘅陳志雲突然話自己係安仔嘅fans，搞到安仔單膝下跪，就連陳志雲都係咁話：「你快啲起身，我受唔起！」
一向擔任《志雲飯局》嘅嘉賓都會被問及感情問題，許志安噚日喺尖沙嘴接受訪問，獲陳志雲送贈兩對粉紅石獅子，佢話早已做好心理準備，所有有關鄭秀文嘅問題都會回答，安仔話：「咁以前記者都會問我同Sammi嘅事，我都講真話回答㗎。」
「最錫許志安」
當記者提議安仔可以反問陳志雲𠵱家佢最錫嘅人係崔建邦定鄧健泓嗰陣，陳志雲即搶答話：「我最錫嗰個係安仔，佢喺我心目中永遠係最受歡迎同最佳男歌手。」當記者取笑安仔接受訪問係為咗年尾男歌手獎拉票，他即時解釋：「男歌手獎同接受訪問兩回事嚟㗎，都唔掛鈎。」
復合機會微
陳志雲於節目未開始前已問安仔會唔會同Sammi復合，安仔話：「冇人知聽日發生乜事，我會話機會唔大，因為我好享受𠵱家呢個好朋友關係。」
