股市只升不跌，八月十七日之事，已是遠古史，記嚟做乜。經紀K提醒我哋，現時之瘋癲情況，超過七二/七三年佢初出道之時，佢當然記得後來恒指跌到一百五十點之教訓。佢做股票咁多年，未見過大藍籌股如長實、新地、港交所之類，一日可以上落八蚊、九蚊、十蚊，甚至二十五蚊嘅。目前講分析已屬多餘，大家唔怕死，只怕畀人笑賺錢少嘅話，惟有依照花旗集團主席ChuckPrince之名言：「音樂仍然響起，跳舞停不了。」
財務C講到「港股直通車」之遲遲未開車，當然係牽涉到中央各部會之權力與利益未擺平，但內裏如何防範洗錢風險或變相賄賂，亦可能在考慮之列。你知啦，現在股市係資金市、消息市、內幕市，涉及內地人嘅話，監管當局有時投鼠忌器，兼且冇資料，好難查嘅。點樣洗錢或變相賄賂呢？譬如有一隻細價股C，股價兩毫，貨源老早歸邊，散戶極少持有。好嘞，資金自由行之後，有人匯五百萬人民幣（中銀監劉明康話個人投資額度不設限）落嚟買C股，入咗二千五百萬股（自然有人配合出貨），之後有人猛咁掃貨，將股價配合甚麼賣殼消息，掃到上三蚊，於是北方投資者賺足七千萬元，割禾青而去，表面上一切合法，北方投資者夠眼光，夠運啫，佢以三蚊出晒貨之後，股價竟然散晒，打回原形，邊個散戶大膽跟風，死梗。
如果「港股直通車」實行試車階段，只准買賣恒生指數成份股，可唔可以杜絕「洗錢」呢？似乎可行噃，因為成份股好難一下子炒高幾倍啫──特區政府幫手就係例外。但係內地人鍾意與熟悉H股、紅籌股，只准佢哋買恒生指數股，恐怕來港資金唔夠多，冇乜刺激性。某分析師下午在中環某酒店飲茶，見到一班操普通話嘅投資客，查探之下，知道佢哋來自北方，包咗五星酒店長房炒股，炒佢哋熟悉嘅H股為主，以大筆資金配合內地消息而炒，貌似日日斬獲甚豐，飲咖啡飲酒飲到眉飛色舞口氣甚大，對呢班人嚟講，有冇港股直通車，佢哋視作等閒。