新城前話事人朱明銳近日回歸新城，重登娛樂台台長職位，高層顏聯武即時被燉冬菇，DJ快必（譚得志）同梁東等更被炒魷，快必日前爆料話朱明銳排除異己，係返嚟復仇嘅受傷動物，噚日朱明銳即刻反擊，直斥快必講大話，仲話受傷嘅動物係對方至啱。
朱明銳話新城好錫佢，自己喺事業上冇受過挫折：「乜嘢受傷嘅動物？我一路好積極、好開心，佢講笑咁講啦，應該調番轉。」佢話快必同梁東工作上屢錯不改，但為保護佢哋，大家協議對外講係自動離職，點知快必向外發放消息，但朱明銳冇意打畀對方了解，佢話：「我有諗過打畀快必，作為朋友，佢唔應該將自己嘅形象𢱑得咁爛，但我最後冇打畀佢，驚佢唔理智，以為我叫佢收口仲衰。」
屢收警告信
快必曾話朱明銳暗示唱片公司要送果籃賀佢回歸，朱明銳就話：「唔好咁講大話！今時今日返娛樂圈，圈中地位不容忽視，啲人好尊重我，我叫咗佢哋唔好送，唔想太誇張，佢咁講我一笑置之。」
其實朱明銳噚日去君悅酒店出席韓星李準基記者會時，都有提到快必爆大鑊，佢話對呢件事唔開心同失望，快必錯在喺節目中言論太過出位，梁東身為節目監製卻漏咗交帶，兩人分別收過三封警告信以上。朱明銳自稱係臨危受命穩定軍心，至於會唔會有炒人第二波，佢初時話肯定唔會，其後又話唔可以保證一定冇喎。