最新動態
03/10/2007.....
有雨
今晚開盤得十多廿場波，撇除巴甲，臨場check吓個陣，可落注嘅場次收窄到6、7場波左右；我就最鍾意咁嘅賭波形勢，一來唔使亂石投林，一注重心，加條4串5，希望好似上個禮拜中車仔炒侯城咁應。
4場直播會各有捧場客，輸怕人嘅衞冕隊AC米蘭會幾矚目，佢哋作客些路廸，好多人唔敢再下注；我問過藍鑽石兄，佢好無奈話A米問題多多，最好踢走肥安啦！我就話班波老態龍鍾，打死都係嗰幾件主力，唔合現今球壇潮流；不過，隊波輸怕人後換回賠率，對住蘇超地頭蟲些路廸，有2.1倍W又唔怕追反底喎。
無論如何，我點都唔會推介利物浦（1.3倍）同不來梅（1.38倍）熱爆單W互串；做咗咁多年波經，呢類貼士常被賭波水平越嚟越高嘅讀者鄙視，中就應該，唔中就笑死街坊。做莊嘅梗係想明星馬「蓮華生輝」同「包裝大師」場場贏，得一點幾倍，中咗咪又係進貢番馬會追「零用錢」、「威利來」W，畀擦鞋仔貼士，唔係我作風！
蘋果波神
股市大旺，英超盛世，大家齊來贏多啲！
http://hk.myblog.yahoo.com/footballexperts/
逢周一至五見報