就好似香港兩大超市集團咁，大陸兩大家電連鎖零售商國美（493）同蘇寧，一向都明爭暗鬥，好戲連場，但估唔到鬥法可以去到呢個境界。
話說十一國慶黃金周係大陸零售商嘅黃金賺錢時機，為咗吸客，扭盡六壬賣行廣告在所難免，蘇寧就大灑金錢，喺《京華時報》落咗十幾個廣告。點知奇怪嘅事發生嘞──國慶前夕買唔到《京華時報》。
據報販講：「有人買晒佢哋嘅報紙。」另一方面，呢批報紙好神奇咁喺國美嘅門市供免費取閱，但報紙外面笠咗國美個袋，至於裏面落咗蘇寧廣告嘅版面，就被人撕走咗。
以本傷人撕廣告
經過報章報道，《京華時報》發行中心嘅人就去查吓發生乜嘢事，結果「每個大型發行點都發現有不明人士看守，以1蚊1份嘅價錢將《京華時報》全部買起。」
記者仲聲稱搵到「大手吸納」嘅神秘人，對方話：「嚴禁蘇寧的十一廣告在市面上賣到，花幾十萬把報紙買了，抵銷它上百萬的廣告效應，值！」
正是「你有張良計，我有過牆梯」，國美以本傷人，蘇寧都唔好恰，記者問佢點迎戰，回應話：「廣告沒有了，那就加大活動力度！」
