港股再創新高，比股神李四叔更早估恒指今年破兩萬五嘅賭神何鴻燊，唔知係咪喺賭場玩得showhand多，噚日又再「大」阿四叔，話唔使等到年底，今個月底恒指就會見三萬。對於華華嚟講，佢兩位老人家邊個贏都唔緊要，最緊要「開口中」。
QDII就快見功
個市咁旺，最受歡迎嘅除咗李四叔同何賭神，一眾分析員、策略師、經濟師通通成為散戶「甜心」，就好似瑞信亞洲區首席經濟師陶冬咁，周不時俾散戶圍。家吓正值十一國慶黃金周，多咗好多「自由人」落嚟香港度假，陶冬碰見大陸粉絲嘅機會亦多咗。
係人都知，雖然港股直通車仲未通車，但大陸股民啲錢，唔搭直通車仲可以搭船、搭飛機……落嚟炒港股。陶冬話，今年係內地資金首年投資海外嘅重要年份，QDII發揮嘅影響力，會遠遠高過資金自由行，佢估計資金自由行最多涉及100億美元，但QDII至少都有500億美金，講緊嘅係大拿拿3900億港銀。
佢仲話𠵱家嘅大陸資金，已經將港股市場視為主場作戰，所以要對喺香港上市，又有高知名度嘅國企股估值重新定位。好似蒙牛（2319）咁，「以前外資連公司名都唔識講，不過對大陸投資者就係著名品牌」，咁佢對蒙牛嘅估值自然好唔同。
咪以為大陸股民唔識炒港股，所以淨係揀名牌，陶冬同華華講，𠵱家大陸股民對港股嘅認識越嚟越深，以前佢接觸啲客，淨係識問買邊隻股好，家陣就連窩輪都識炒，會問佢買邊隻輪好。難怪窩輪市喺恒指嘅交易量迅速增長。陶冬話冇必要去干預，但就擔心咁樣發展落去，真係「修女也瘋狂！」
港澳形勢逆轉
講開國慶，呢兩年輪到香港特首風光，澳門特首閉翳，國慶遊行呢個「節目」，由香港移師澳門。不過，撇開呢個國慶特備節目，澳門都仲係一片昇平，陶冬話，自從澳門威尼斯人度假村開咗，佢去威尼斯同客開會，多過去港島香格里拉，真係勢估唔到香港竟然會有被澳門挑戰到嘅一日。其實之前亦有人提出，喺香港大搞會議旅遊業，但港府只係講多做少，呢啲咪叫不進則退囉！
[email protected]