國慶日政商財金界中人，好多都忙住幫祖國慶祝生日，東方海外（316）主席董建成噚日就好得閒，可以同家人一齊返工──喺公司睇煙花。東方海外個辦公室喺灣仔海港中心高層，有一流煙花景，所以董建成話每次放煙花，都會同家人返公司睇，仲話一年得幾次，睇極都唔厭。
不過，佢大佬、全國政協副主席董建華就冇咁得閒。董建成話大佬仲有大把公職喺身，所以冇一齊睇煙花。其實董建成公職都唔少，噚日出席香港海事博物館同香港航運發展局聯手搞嘅「世界航運聚焦香港」展覽開幕儀式，東方海外係行內阿頭，所以佢當然要支持吓。
咁做航運嘅董建成，去旅行時會唔會特別鍾意坐郵輪呢？佢話上次坐郵輪，已經係十幾年前嘅事，好似住酒店，好relax，不過喺隻船度日日食足五六餐，雖然多數係佢鍾意嘅西餐，但「日日食都厭啦。」可能就係咁怕咗坐郵輪。