內地人炒股炒到癲一啲都唔難明，呢個牛市百年一遇，誘惑唔係咁易擋，為怕錯過，人人搏晒命。好似內地網友江陰風彩就喺《中金貼吧》高呼「我要從一無所有變為（身家）百萬」，佢話：「𠵱家牛市真係令人覺得百年一遇，可惜冇錢。好彩得朋友信任，舊年五一（勞動節）小借5萬，家陣滾到廿七八萬。」
先變30萬贏5倍
不過，呢位網友似乎唔似陶冬講到咁瘋狂，頭腦仲好清醒，起碼知道風險，佢話：「股海之深，冇人能知底，目標係先變成30萬。人心不能貪，小心為上，希望不遠嘅將來賺個百萬銀。」
股市過江龍就話：「好一個戒貪，不過都要對行情深入理解。」
王美麗大讚：「運氣唔錯，新股連連中，祝賀！善於理財，借雞生金蛋，佩服！有大目標，資金超百萬，事成！」不過，網友零零貳壹三零酸溜溜咁話：「我點解中唔到㗎？炒股到家吓都未中過！」
咪以為借錢炒股嘅江陰風彩好有信心，佢話：「點解總係唔跌？睇嚟散戶鬥唔過基金，散戶只係沙，基金先係水泥，只有水泥才能凝沙，水泥力量越嚟越大，沙子顯得無所適從。」