噚日，港股單係一個上晝，成交金額已經高達1157億銀，散戶網友就話要多謝大陸同胞撐港股。
Ken仔話：「我哋恒指同H指能夠創新高，都係多得班大陸同胞，要向佢哋致以最崇高敬意。」SW1亦話：「鬼叫大陸國慶放假咩？內地股市休市，班同胞悶，咪走晒落嚟炒港股囉！」Stevengg講：「咁今勻嘅假期咪真係十一『黃金』周。」
內地休市嚟港炒
Brookieleung更話：「自己越嚟越愛國。」梗係喇！內地資金湧港炒股，個市跌完又升過，散戶點會唔愛國啫。
Scaretable就話：「香港人應該好好向內地同胞學習乜嘢叫做拼搏精神，內地人夠膽死由兩萬點，一路買到上三萬點，面不改容，膽小如鼠嘅香港人絕對比唔上，抵人哋發。」
hk86結案陳詞話：「𠵱家講乜嘢分析都冇用，想贏錢，夠薑買就得！大陸同胞萬歲，港股當A股咁炒！」