筆者多番指出，美股創新高指日可待，因為美國經濟得番一條腿支撐，故此無論「無形之手」或「有形」（減息）的，都會輪流使出，兼且手口（暗示甚或吹風息仲有得減）並用驚死無人知。果然不出所料，美股道指搶先一步，前日改寫歷史紀錄。
不說不知，在英明神武的總統先生領導下，過去8個季度中有7個季度，第1個交易日升到不亦樂乎，只有一季陰溝裏翻船而已。
就以前日而言，光是全球最大的花旗銀行發出第3季盈利下降60%的消息，若以常理推論，莫說股市會受拖累滑落，股價也應下跌才是。豈料花旗股價竟升2.25%（升幅大過道指），帶動道指創新高。叻啦啩？
這個世界已不可用理性去分析或解釋事物，另一個例子是歐洲銀行界一哥瑞銀（UBS）同時發出盈警，指第3季業績將出現稅前虧損達60億瑞士法郎，其股價反升3%。喂，蝕本喎！咁都得？
這又何奇之有？難道怪得過港股乎？美國要撐經濟，內地炒供求，股市升乃無可厚非；港股有直通車故障未通，又憑啥勁過坐「神六」？
由萬九點升上兩萬八點，周不時裂口高開，請問有多少人買到？股民被搞到「神經錯亂」兼「六神無主」，惟有眼光光喺度戥人高興。然則廣義點睇？其實個個不也在戥美國佬高興!?