日本女星澤尻英龍華上星期六喺東京宣傳新片《ClosedNote》時十問九唔應，全程仲蹺埋雙手，佢嘅態度即時引起網民議論紛紛，唔止日本fans對佢失望，好多網民都上香港討論區留言插佢。澤尻噚日就即時喺自己嘅官方網站留言認錯。
澤尻噚日喺官方網站留言話：「諸惡的根源全部在我身上，我要負上責任，今次這件事令到各位fans失望，明顯地是我背叛了自己的fans，作為一位女優、一個專業的藝人，我深覺自己表現得不夠成熟，從今開始我會改變自己，對不起大家。」不過，日本報章《東京Sports》又爆澤尻曾經喺同志酒吧醉酒鬧事，甚至忘形露胸。
「步姐都冇咁寸」
喺澤尻未發表道歉聲明之前，日本電視台都街訪咗唔少fans，佢哋覺得澤尻非常失禮，前日香港討論區亦有網民狂鬧澤尻，其中網友Paris_Hilton123話：「返屋企做女王啦，佢個妝好核突好唔襯佢，唔好以為自己好靚女啦。」網友doraemon250就話：「真係俾佢喺《一公升眼淚》個角色欺騙咗！」
有網友鬧鬧吓澤尻變咗大讚濱崎步，網友C0ol話：「澤尻以為自己天后咁，我女王（AYU濱崎步）紅到變紫都冇咁寸，真係新不如舊，死返屋企黑面啦！」
此外，坂口憲二前日喺東京出席新劇《醫龍TeamMedicalDragon2》記者會搞笑咁扮澤尻答話，段片YouTube都有得睇。
版主：網盜王尊尼Deep
本欄逢周一至五刊出
香港討論區網址：
http://www6.discuss.com.hk/viewthread.php?tid=5437327&extra=page%3D1&page=1
澤尻官網網址：
http://www.erika-official.com/
坂口憲二記者會扮澤尻網址：
http://www.youtube.com/watch?v=ufQlmMHdKTQ