利物浦隊長謝拉特日前喺一宗交通意外，撞斷咗一個細路隻腳，但佢喺意外發生之後表現好值得一讚，冇不顧而去，仲留喺現場陪個傷者直到十字車嚟為止，做咗個負責任嘅司機。
話說喺日前下午，27歲嘅謝拉特揸住佢部價值175,000鎊（約272萬港元）嘅黑色賓利開篷車去朋友屋企途中，喺轉左嘅時候撞親一個叫占美嘅10歲細路。一個目擊者咁講：「謝拉特佢知道撞親人後，即時喊咗出嚟，仲第一時間落車，跪喺傷者身邊緊握佢隻手安慰佢，足足陪咗佢成15分鐘，直至十字車到場先至走。」
撞傷細路即場安慰
另一個目擊者就咁講：「謝拉特臨開車走時，我個細仔走出馬路問佢攞簽名。謝拉特雖然因撞親人而好唔開心，但仲識得同我個仔講馬路好危險，返入行人路先簽，真係好注意安全。」
聽講占美佢隻腳有兩處骨折，但就冇生命危險。聽喺事發現場嘅居民同謝拉特嘅發言人講，謝拉特當時揸得好慢，占美佢突然衝出嚟，結果就俾謝拉特部車撞親。謝拉特去咗差館畀口供，之後佢會接觸占美嘅屋企人同埋了解占美嘅傷勢，仲計劃去醫院探佢㖭。
我求大俠仲收到風，謝拉特原來有前科，之前喺04年因為不小心駕駛而被罰1,000鎊及扣咗5分，睇嚟佢以後揸車真係要打醒十二分精神。話時話，今晚利物浦有比賽，會喺主場同法國馬賽進行歐聯分組賽。雖然呢單嘢謝拉特應該冇唔啱，但撞斷個小朋友隻腳，心情唔靚就一定，希望佢臨場嘅發揮唔會因為咁而受到影響啦！