陳慧琳（Kelly）與陳奕迅（Eason）為迎接08北京奧運，昨日在銅鑼灣出席「奧運火炬手公眾投票」活動，穿上短裙高跟鞋到場的Kelly，不時被大風吹起短裙，結果她既要拿咪高峯及講稿，又要用手按着裙免走光，顯得有點狼狽兼尷尬。
剛在北京完成電影《江山美人》的陳慧琳，原本悉心打扮出席北京奧運宣傳活動，可是現場不時刮起大風，雖然風勢不算強勁，但不時吹起她的短裙，幸好Kelly眼明手快，風到手到，按實短裙。猛風吹得Kelly有點狼狽，但她表示已做足安全措施，她說：「條裙有幾層，我梗係有着短褲打底啦，你估我儍嘅咩？」
Eason自薦傳聖火
Kelly表示能夠完整無缺拍完新片返港，可算謝天謝地，不過臨離別時卻令導演程小東流下男兒淚，她說：「拍完大家都好唔捨得，我攬住導演喊，搞到佢都喊埋一份，不過今次拍得真係好辛苦，最開心係着晒盔甲好英咁同甄子丹對打，覺得自己好勁，我返到屋企對住男友耍棍，嚇到佢退後，𠵱家係我手下敗將。」
Eason貴為奧運火炬宣傳大使，原來他曾填寫參加表格，希望成為傳遞奧運聖火的其中一分子，但最終落選，Eason說：「我喺張表格度用英文寫咗100字自我推介，話自己做過宣明會、奧比斯之類，對社會有貢獻。落選都唔會失望，最多到時傳火炬我係側邊陪跑攝位。」
有報道指Eason會到新城與重任娛樂台台長的朱明銳握手破冰，Eason認為作為歌手沒有既定立場，一切聽從公司安排。
力撐黎明好好傾
此外，Kelly昨日接受商台節目訪問，談到她早前到北京沙漠地帶拍攝電影《江山美人》，對於拍檔黎明一向被指很cool，Kelly即時代為澄清說：「佢唔cool，佢開工係咁講嘢，又講佢啲車，又講佢拍《梅蘭芳》時做手好嚴，同佢都好好傾。」
採訪：魯萍
攝影：仇志德
