近排因為東京遊戲展關係，電視遊戲大多會避開呢個旺季推出，免得被搶晒風頭。不過電腦遊戲方面就無呢個禁忌，大作陸續上場，今期最多人玩嘅MMORPG新作係邊隻？當然要數到《封魔獵人》。遊戲內有超多角色職業，公測開始就成為遊戲網站人氣榜前列，今期必玩！
記者：許福合
一切由初心者開始
《封魔獵人》剛開始進入公開測試階段，暫時所知遊戲會採用免費制，即係各位只要到官方網站填填資料，申請個賬號，再安裝好遊戲程式就可以玩！
畫面用上可愛趣怪嘅日式風格角色，啱晒我呢啲玩慣日系遊戲嘅玩家。另外遊戲內容雖然都係標準嘅MMORPG，不過亦加入唔少新元素，例如以中西鬼怪為遊戲主題，再加上各種千奇百怪嘅鬼怪嘍囉、頭目，最正仲係職業角色特別多，二轉職業總數多達八種，角色可有多種玩法同特性。每名角色開始遊戲都屬初心者，未轉職前技能都相同，不過筆者覺得大家一開始就選定一種二轉職業做目標比較好，如果想轉靈媒或方術士，配點就選擇智慧及魂力，而力量就作用不大，及早選定方向可避免浪費點數。
轉職前可試招
當設定好角色進入遊戲後，同其他遊戲一樣，會有NPC教授操作及介紹，完成後就會離開村莊。這時會見到戰鬥導師，佢會有打怪任務提供，提議各位做好佢，因為既可以升級，仲有裝備拎㖭！
因為一開始所有角色都係初心者，所以技能都一樣有七種，而且都是一轉前技能預覽，讓玩家預先試招，決定發展方向。例如重擊及狂擊就係武士招數，靈氣及魔力之光就係方術士，靈能加持及石甲護身就屬於靈媒，另外還有機械士初版嘅靈魂石製作。雖然轉職之後，技能才有望升級及加強，不過可讓玩家轉職前率先試招體驗玩法，其他遊戲就比較少見。
一轉角色介紹
武士
武士屬於強力近戰攻擊角色，主要以物理攻擊為主力，同時又是擋怪人物首選，遇到Boss及怪物，武士定必具備。配點方面以力量為主，靈敏及技巧為副，應有唔錯效果。
方術士
方術士現時所見屬最多人玩職業，因為攻擊力非常高，常以魔法攻擊。配點以智力為主，魂力為副，再加上一定的體質去提高血量。
靈媒
靈媒因為係輔助型職業，組隊方面比較容易，石甲護身可以變身保命，但攻擊力相對較低。配點因為魔力比重多，應主力點上智慧及魂力，而體質亦要注意。
機械士
能夠自行製作裝備嘅職業，同時又具備遠攻能力，武器主要以弓及槍為主，只要點上靈敏及力量，威力相當唔錯。
Profile
機種：PC
類型：MMORPG
開發：遊戲橘子
網站： http://tw.brightshadow.gamania.com/