胡杏兒在《歲月風雲》中情陷4角戀，她飾演的癡情秘書方秉怡，一直苦戀着激愛佘詩曼的林峯，雖然為對方不停付出，奈何只能當上佘詩曼愛的替身，幸最後能與馮紹峰成眷屬，總算大團圓收場。杏兒直指其角色太偉大，在情路上戇居又犯賤，有若燈蛾撲火！
在無綫60集長劇《歲月風雲》中，胡杏兒飾演的方秉怡一直癡戀華振邦（林峯飾），對愛情只有付出卻沒有回報，即使林峯曾經答應跟她結婚，但他始終心繫至愛的榮秀風（佘詩曼飾），直至杏兒目擊二人藕斷絲連才終於心死，與飾演華振邦堂弟華振民的內地演員兼緋聞男友馮紹峰拍拖結婚，正式了斷跟林峯拖泥帶水的戀情。
「人有時就係戇居」
杏兒日前在電話中說：「我嘅角色唔係好多戲份，前段係個儍女秘書，受松哥（劉松仁）所託睇住林峯呢個少爺仔，林峯敗家後，我扶持佢度過難關，佢同阿佘一齊時，我一直都鍾意佢，但我係愛的替身，後尾發展到結婚，先feel到呢個人心目中仲有阿佘，但我個角色敢愛敢恨，對佢幾決絕，之後至同馮紹峰發展感情線。
「喺戲外睇番呢個女仔都幾儍女，呢個世界可以有咁偉大嘅人嘅？但人有時就係戇居、就係犯賤，有一刻可以一齊就一齊，可以燈蛾撲火㗎啦，我同林峯都係犯賤男女。」
也許方秉怡的偉大太超脫現實，反而她跟華振民的發展來得自然，信服力也較大，杏兒說：「我同佢嘅感情線好平淡，當時我冇咗林峯，佢又冇咗個內地女朋友，係大家失意時互相扶持啫，同佢唔會咁激，細水長流啲，發生嘅嘢唔會轟轟烈烈，後尾我哋拍拖結婚，都有講到中、港兩地人結婚要面對嘅問題。」
讚馮紹峰夠紳士
雖然杏兒和馮紹峰傳緋聞，但她仍不避嫌讚對方說：「馮紹峰係一個好男仔，好gentlemen，我同佢相處OK，佢經常都有推薦我去內地拍嘢，幾好㗎，但我冇同佢拍拖，你哋有冇好姊妹介紹畀佢呀？」問她會否擔心緋聞越傳越盛？杏兒笑說：「緋聞傳傳吓都冇啦，當古仔睇囉，娛樂新聞啫。」
杏兒又稱與林峯多次合作，但沒有戲假情真，她笑說：「我唔會拍戲分唔出鍾唔鍾意林峯，戲中鍾意佢，唔係真正嘅自己，都係做戲啫，roll機時會投入角色，佢都係做角色啫。真人嘅阿峯，人哋覺得佢斯文，唔會多嘢講，其實佢幾鬼馬，幾鍾意講笑，個人都幾風趣。」
採訪：朱倬誼
攝影：陳偉權
服裝：SistyrMoon
搶先睇：有情人排除萬難
第57集劇情講述危永標（馬德鐘飾）全力研發豪華轎車，更大量裁員減低車廠開支。因豪華轎車製作成本高，永標吩咐下屬虛報原料價，以成本價格低的假象瞞騙董事局。華文碩（苗僑偉飾）和華振民（馮紹峰飾）離開華喆後，合作開設4S售後服務店，準備大展拳腳。
華文翰（劉松仁飾）鼓勵華振邦（林峯飾）研發環保車，開拓新市場。振民終於說服方秉怡的父親讓他們結婚，秉怡更可以隨夫居留北京，跟振民一起努力打理4S店。華文碩成功重奪愛人的心，跟汪紹芬（鄧萃雯飾）復合。
