前星期與資深航運版編輯Ｌ傾偈，得悉航運業空前好景，一啲中資航運公司上上下下都笑口常開，唔使等到年尾攞到花紅，人人已經從股票賺到飛起，乜唔係啫，仄吓中遠太平洋（一一九九），中國遠洋（一九一九）嘅股價就知。今年四月時買入（一九一九），以百分比計，賺得多過（三八八）港交所。不過股價升到現時水平，編輯Ｌ都有啲驚驚哋。
航運業多得中國印度經濟高速增長，買入大量亁貨（非標準貨櫃運載貨物），一條十幾萬噸嘅貨船，日租去到十三萬至十七萬美元，一年（以日租十四萬美元計）可收到五千一百餘萬美元租金，而成條船嘅造價，不過係億零美元，即係話，買條新船，兩年回本，好賺到不得了，故此船廠生意大旺，隻廣船國際（三一七）嘅股價亦同時升到飛起。
呢日食飯與船務Ｃ坐埋一齊，佢話老闆直情發夢執銀紙，日頭對住佢哋咭咭聲笑，因為同一條船，三四年前只係日租七八千美元，要周圍搵客㖭，當時點會諗到今日會發到嘭嘭聲㗎。正因為亁貨船CapeSize（好望角型，十至三十萬噸）好搵，船公司不時獨資或與投資者合資組織海外離岸公司嚟買新船，第一件事就係去銀行開戶口。船務Ｃ話：「香港啲銀行跟美國反恐，反洗錢方法，跟到十足十，到銀行開戶口填表，麻煩到極，銀行緊守knowyourcustomer原則，要追查每一間離岸公司嘅幕後股東，我哋同佢往來二十年，一樣要樣樣申報。故此唔少行家為免麻煩，去咗新加坡銀行開戶口，話都冇咁易。新加坡方面表面跟隨美國做法，實際上非常靈活，對舊客從不苛求。香港維持金融中心地位喎，俾新加坡搶咗唔少戶口都唔知！」此乃水清則無魚嘅最新詮釋，新加坡無時無刻都有針對性政策挖香港生意，香港百分之一百緊跟美國佬方法，就俾新加坡吼到一啲機會。至於新加坡點解咁靈活唔怕美國佬，大概係李光耀可以一言九鼎啩。