人窮靠紙皮幫補家計見得多，但靠紙皮上位兼上市就真係好少見。合豐集團（2320）主席許森國都算係異數，佢同華華講，父母喺60年代嚟香港，生活艱難，所以佢12歲就拉埋對落嘅細佬一齊出去做童工，搵到幾多全數上繳畀老媽子。
佢仲話，第一份工喺山寨廠度綁紙盒，佢同細佬一個返上晝，一個返晏晝，兩人每日合共賺6蚊，一個月開足工可以搵到百幾蚊㗎。除咗紙盒廠，許主席仲做過送外賣、印刷工人，甚至坐吊船喺幾十層樓幫人抹玻璃窗，驚唔驚？「我最怕窮，只要搵到錢，乜都冇有怕。」
到84年，大個仔兼已經脫貧，許森國決定自己開廠唔打工，同屋企人夾咗4萬蚊，喺荃灣租咗個廠房，買咗四部機，冇客喺手都夠膽開張。佢話，「嗰陣攞住卡片，逐間廠搵生意，開頭怕醜到不得了，見到人未開聲，自己已經掉頭走，但一諗到唔食都要交租，咪拍心口頂硬上囉，結果第三日，終於接到第一單生意。」
唔怕老笠最怕冇生意
到88年經客人轉介，開始喺大陸市場搵新客，「當時真係膽生毛，日日坐公車去掃廠，一間掃完去另一間，之後就索性坐電單車，穿梭各區，完全冇諗過萬一俾人老笠或者綁票，會有咩後果。」
許森國再三同華華講，「我最怕窮！」所以就算當年開咗廠做老闆，每年年廿五停機過年，機停人唔停，事關一早投咗維園年宵檔，趁年尾幾日擺檔賣年花，咁都未算，大年初一，再直落深水埗福榮街，開檔賣賀年朱古力，唔會浪費每一個賺錢機會！