股市又返到去97年前嘅昇平盛世，先唔好理有冇十月股災，散戶網友賺到錢嘅，都想豪一豪，嗱，佢哋嘅豪使法絕對需要家長指引，好似飛俠話：「今日一開眼就賺大錢，單日25%回報，好！搵晚食豪啲，最開心係三五知己加親人至愛，可以一齊賺一齊食一齊玩。」佢連菜單都諗埋，「食頂級鮑魚+三両一客嘅魚翅+鵝掌花膠+三味大龍蝦+支86紅酒」，呢圍一哥鮑魚館全餐，佢估計每位1萬銀。
高級新手仲誇：「今晚去食黑松露菌，順便打包條蘇眉餵貓。」paulchen（沽剩藍籌）就嫌佢：「咁孤寒㗎，我訂咗架A380（超級飛機）代步。」
big_joe_b就話食最重要，刁鑽菜單有，「今晚去食老鼠班，要一斤，不過只食臉豬登。開支Ricard啷啷口，啷完就唔要啦，順便打包啲老鼠班返去餵曱甴。」
小心上錯大閘蟹
坳腰就話：「今晚又要去食阿一鮑魚。」少爺威語帶雙關話：「小心隻飽魚洗唔亁淨，食到你肚『瀉』。」yeungph亦話：「小心佢上錯大閘蟹畀你。」
呢啲咁嘅盛世，香港都好似出現過，華華記得當年去酒樓食飯，真係有味「魚翅撈飯」，至於上面幾位網友係吹水定晒命，就唔使華華講出口啦！