行在大馬路上，忽然聽到有人在後嗌左丁山，回頭一望，印度C（MichaelChugani）是也。於是與佢站在戲院里閒談幾句，問佢近況如何，離開亞視之後，最近撈邊瓣？印度C話：「唔做英文台新聞編輯啫，仍然為亞視主持節目，替《南華早報》寫專欄，及做自由撰稿人，例如代專業團體編書，寫講稿等等。」咦，咁多瓣，山大斬埋有柴，而亞視過往在舊人管理下，素於慳儉見稱，印度C𠵱家可能搵錢更多，可見天生我才必有用，有麝就自然香。適值今日香港英語人才缺乏，以印度C嘅資歷，做英文陶傑都得啦。
講起陶傑，印度C話Cup有諗頭，將佢在《南華早報》專欄文章，選錄成書，由專人繙譯，陶傑寫評註，英文名《DoubleTalk》，中文叫《不中不英》。印度C話本書在七月趕及書展出版，甚為暢銷，八月已經出第二次版，各書局有售，此書適合學習英文寫作之人閱讀喎。
印度C與左丁山係老相識，佢之回流香港，從華盛頓返嚟香港做英文報紙老總，左丁山出過一份微力，佢又曾與陶傑在英文報紙做同事，兩人老友鬼鬼，合作出書搵銀，合邏輯之至。與佢拜拜後，中午就到中環三聯書店（德己立街）買書，拎埋去食飯。飯局上，大公關華德話佢已經買咗幾本送畀同事睇，佢話印度C英文好，陶傑評註精闢，譯者（陳維熙）譯筆流暢，好啱學生睇。
打開《不中不英》瀏覽一番，特別留意陶傑評註，果然幾好心機噃，例如第八十四頁，印度C講到JohnLukacs，陶傑就簡單介紹約翰盧卡斯係何許人也，第五十六頁解釋Igavemyselftheluxuryofboth，第二十四頁講解彭定康的paunch與pomp之對比，一般人未必一睇就明，而陶傑評註有畫龍點睛之妙。
印度C之專欄，平時睇得多，估唔到呢次睇《不中不英》因有陶傑妙筆，睇得仲過癮，左丁山急忙向中七預科生Y介紹，叫佢多讀此書，當作UE科進補。英文科老師教作文與閱讀，不妨以此書為補充教材。