AIG（美國國際集團）旗下AIU嘅總裁兼董事總經理麥邵斯（RossMatthews），早幾個月前離開咗AIU，唔少行內人都關注佢嘅去向，事關呢位「麥生」喺保險界頗有名氣，曾擔任AIG台灣首席執行長，又促成AIG入股中國財險。華華聽聞，麥生7、8月離開AIU後，會加盟一家投資集團，由香港搬去上海工作。
麥生轉投嘅投資集團，其實係佢舊大老闆落腳地。05年3月份時，AIG前行政總裁莫里斯‧格林伯格因為爆出造假賬醜聞辭職，轉戰投資集團C.V.Starr&Co.（內地稱為史帶投資集團）做主席兼行政總裁，聽聞麥邵斯就係加盟呢間公司。
史帶投資集團嘅瓣數都唔少，保險、私募基金、對冲基金都有，家陣仲持有3600萬股AIG股份，市值24億美金。
講番少少歷史，格林伯格同本港政界商界淵源不少，佢曾經係前特首董建華成立嘅國際顧問團成員之一，同前國家領導人江澤民及朱鎔基有關係良好，幫助中國喺中美貿易問題上游說美國國會。