Car通：N24青檸版瘋狂偷輕　落場即砌

Car通：N24青檸版瘋狂偷輕　落場即砌

占士邦喺《皇家賭場》贏咗架AstonMartin返嚟冧女仔，雖然引擎馬力的確好勁，不過架車黑黑灰灰太沉實，若然改揸今日呢架「青檸Martin」落場版N24，肯定唔只識多幾個邦女郎咁簡單，全輕量跑車化更毋須改裝便可落場砌車，壞人邊走得甩呀！

記者：梁美甜
攝影：陳偉強
模特兒：Michel

今年六月，AstonMartin嘅N24喺Nurburgring（紐堡林）24小時耐久賽獲勝，當時老闆DrUlrichBez就承諾會推出一款最接近嘅版本Vantage，全球車迷引頸以待，即係今日嘅青檸版N24喇！
N24前身乃豪華英式貴族跑車V8Vantage，要由豪華版變得近似當日喺跑道奪魁嘅競賽版，首要係大幅偷輕！所以N24以AstonMartin旗下最細車形嘅V8Vantage為核心藍本（只有4.38米長），再將車櫳入面不必要嘅設置同空間完全拋棄，創造出一部純跑車格局，再配搭全新開發嘅V8引擎，令馬力輸出達至410hp，加上使用大量鋁合金材料以達到輕量化嘅需求，令車重大幅度偷輕，大大提升起步爆炸力之表現。

乜都唔改已可落場砌

經大改嘅N24最巴閉處，係已經得到FIA認證，即係話毋須進行任何改裝，已經可以直接參加VLN耐久賽、Britcar耐久賽、歐洲耐久賽、德國Supercar挑戰賽同埋澳洲GT等賽事，甚至係歐洲GT4系列賽及美國Grand-AM、SCCA房車賽等，實力絕對毋庸置疑，若然擺喺香港嘅街道，真係輕輕一下油門已絕塵而去！

N24引擎、外形大變身

■為咗輕上加輕，改用塑膠邊窗和後窗，駕駛座仲可以橫拉㖭。

■N24為跑而跑，五輻式鋁合金胎軨賣相兇狠，散熱及剛性一流。

■N24車頭鬼臉罩圍咗條青色框框，襯落好好有青檸Feel。

■肉眼所見，N24引擎最明顯就係多咗個低密度頭段觸媒轉換器。

踢走豪華設備　減磅250kg

既然要令豪華版V8Vantage夠格落場競賽，那麼車身輕量化就係首要，於是大家會發現N24市售版本將原有嘅空調系統全部抽走，仲將車廂內部份舒適配備移除，好似皮椅、手枕、音響設備、地毯等等，再改裝防滾架、六點式安全帶設計嘅跑椅，但呢啲重量都唔及副偈瘦身來得有效，以較輕嘅鋁合金材料製成輕量版V8引擎，由此經過一定程度輕量化程序之後，車重僅1,330kg，減輕大約250kg，拜引擎重量減輕緣故，車身配重前後比重為49:51，令車輛過彎時動態更為靈活，更能夠兼顧高速直飆嘅穩定性。

■六點式安全設計跑車桶椅，劈急彎仍可穩穩定定。

■已裝配防滾架，符合FIA認證，即時落場都得。

■香港代理同時引入白色及黃色N24。

■3幅式軚盤亦以精簡為主。

■減少豪華設備，故中控台相當簡潔。

輕量化　競賽車

動力方面將排氣系統進行調整並改用亁式油底殼，有助於激烈過彎時能維持機油流動嘅穩定度，同時可以達到410hp/7,500rpm最大馬力境界，較一般版本增加30hp嘅馬力輸出、最大扭力亦可以達43.2kgm。變速系統則只能提供六速手波，變速箱就採用Valeo競技版雙片式陶瓷鋁合金強化離合器，搭配輕量化飛輪嘅使用，更能輸出強大動能，令V8VantageN24發揮超強悍嘅性能表現！N24更強化底盤同車身，令車輛更穩固，可以話買部車返去唔需要再改裝或加裝，就可以隨時用來參賽，都咪話唔犀利！

AstonMartinV8VantageN24約$1,300,000
規格

引擎：4,280c.c.V8
馬力：410bhp/7,500rpm
扭力：425Nm/5,000rpm
傳動：6前速手波
查詢：MFJebsenAutomotiveLtd（23662017）

■有名有姓嘅N24，夠晒Special。