港股氣勢點只如虹，直情如夢，有如在夢境一樣，恒指又大升超過1000點，昂然進入28000點大關，由24000到28000，上升成4000點，只係短短13個交易日，揸住大藍籌、國企同中資股，勢估唔到可以贏咁多，贏到夜晚瞓着覺都會笑，直情發夢一樣。
不過，唔係全世界嘅人都咁開心，大股升不停，細股就冇得升，噚日個市氣勢咁勁，成交創出1600多億高紀錄，但好多股仔仲係發緊「吽哣」，好多唔升仲要跌，噚日下跌股（唔計認股證）仍然係超過400隻。
其實，由9月開始，大市叫做升咗4000點，但下跌嘅股份，日日都有成400至500隻，呢類九成九都係股仔，冇揸到大價股嘅，升市完全冇份，點會開心？
不過，筆者相信風水輪流轉呢句說話，除非個市大冧檔，否則升完大價股之後，股仔點都會炒番轉，以家下熱錢億億聲咁計，一堆落股仔度，肯定會升到七彩。有股在手嘅，揸定定，或者擇肥而噬，隨時會賺番一個開。
購船廠有盈利保證
和成國際（651）復牌，先升後回，最高曾見0.214元，收0.195元，沽壓幾重，但大戶「硬哽」亦顯示出「大無畏」精神，只要大戶在0.20元水平收亁貨之後，升勢應會一發難收，初步目標係0.28元，中線可上0.40元。
和成轉型，收購大型造船廠，已簽妥意向書，待審查完成後即可落實。和成市值24億元，而收購呢間位於江西的江洲聯合造船，公平市值亦不少於20億元，最吸引嘅係，船廠保證08年度（12月年結）嘅除稅後溢利不會少過6億元，若以公平市值收購，PE只係3倍多，就算作價30億元，PE亦只係5倍，對和成好有利。
中國造船業發展蓬勃，近年盈利急升，亦係大眾股民熱捧嘅對象，就以廣州廣船（317）為例，現價成53元，往績PE95倍，預測PE27倍，和成收購一搞掂，有排升。