銀行消費信貸業務競爭白熱化已經到咗全方位階段，唔單止產品要新，人才同思維都要搞搞新意，好多銀行招聘時都開始多啲crossover，向市務推廣嘅專才埋手。好似擅長做推廣、洋名Lambert嘅陳立業，最近就過檔星展（香港），做信用卡及無抵押信貸董事總經理，接替跳槽美國運通後再過檔滙豐嘅前任主管蔣偉森。
據華華所知，Lambert已經喺星展返工，直接向身兼零售銀行業務總監嘅董事總經理張耀堂滙報。記憶中，呢次係星展首次搵非賓架出身嘅專才，擔任消費信貸主管，相信以Lambert咁活躍嘅性格同專業資格，雙方可以擦出火花。
其實陳立業都唔算同銀行完全沾唔上邊，事關99年，佢就曾經加盟花旗（當時仲係萬國寶通），出任萬國寶通投資管理（亞洲）董事及退休金業務主管，之不過佢更大部份時間，係服務電訊及其他行業。
推廣高手crossover
86年畢業後，Lambert先後從事印刷機同隱形眼鏡嘅市場推廣及銷售工作，90年加入電盈（008）前身香港電訊，一做就9年，仲係當時公司最年輕嘅總經理，佢創立嘅流動電話品牌「One2Free」，相信好多人都識。2000年轉任盈科天馬動力營運總裁；加盟星展前，出任香港旅遊發展局市場推廣總經理。
Lambert係虔誠教徒，曾經係福音歌組合「轉捩點」主要成員，錄過幾張唱片，又喺基督教餐廳酒廊做歌手，舊年仲出咗隻「IamnotAlone」CD，希望喚起年輕人對基督教嘅興趣。