四叔李兆基已經公認係香港股神，9月19號話恒指見兩萬八，十月都未到，恒指就已經升到上兩萬七。嗱，四叔有張「實聽升的名單」，華華都有張「富豪抽新股戰績榜」，趁十一國慶嚟個第三季季結，結果四叔除咗係股神，仲係「新股王」。
富豪稀客都落場
無嘢嘅，四叔係大好友、錢又多，所以今年頭三季，富豪當中以佢認購最多新股，咁啱佢揀嘅新股，又冇乜令佢老人家失望，所以賬面賺得最多嘅咪就係四叔囉。
眼光獨到嘅四叔，先後認購碧桂園（2007）、洛陽鉬業（3993）、合景泰富（1813）、復星（656）同恒鼎（1393）5隻新股，為佢老人家帶嚟賬面利潤近21.9億銀，當中貢獻最多嘅係碧桂園，賬面賺成14.6億銀。
金融圈好多人都知，四叔同彤叔好老友，唔知係咪咁，所以彤叔都有同四叔一齊認購碧桂園、洛鉬同方興地產（817），賬面獲利18.6億。
至於近排成日同股神唱反調嘅大中華首富李嘉誠，今年就唔係認購咗好多新股，只係透過長實（001）同李嘉誠基金入股洛鉬同復星，進賬咗2.9億。
今年股市旺到飛起，新股就差唔多同中六合彩一樣，總之抽中都有錢分，所以唔單止吸引咗好多唔炒股嘅散戶去抽新股，連好多富豪級「新股稀客」都落場，好似一向都好尊重彤叔嘅大劉劉鑾雄，不過，佢認購嘅復星同恒鼎，偏偏彤叔就唔係好buy噃。
仲有九倉（004）主席吳光正亦都好少見佢抽新股，今年亦都唔執輸，用2000萬美金認購咗奧園（3883），用6億港銀抽SOHO中國（410）。其他稀客仲有中信泰富嘅榮智健同糖王郭鶴年。
細劉斯人獨憔悴
另外，新地（016）郭氏兄弟就認購咗復星，二佬郭炳江更加自己獨自搵食，入飛認購合景泰富。不過，郭炳湘最近都單拖用1000萬美金認購奧園，不讓細佬專美。
不過，唔係個個大孖沙都億億聲咁賺嘅，細劉劉鑾鴻買嗰隻舜宇光學（2382），掛牌至今，股價跌近兩成，賬面蝕咗千四萬，莫非佢今年流年不利？
[email protected]
今年富豪認購新股戰績榜
李兆基
賬面獲利（億元）：21.92
持有新股：碧桂園、洛陽鉬業、合景泰富、復星及恒鼎
鄭裕彤
賬面獲利（億元）：18.62
持有新股：碧桂園、洛陽鉬業及方興地產
榮智健
賬面獲利（億元）：12.86
持有新股：碧桂園、洛陽鉬業及合景泰富
郭鶴年
賬面獲利（億元）：9.07
持有新股：碧桂園、復星及恒鼎
李國寶
賬面獲利（億元）：3.63
持有新股：洛陽鉬業及恒鼎
李嘉誠
賬面獲利（億元）：2.89
持有新股：洛陽鉬業及復星
郭氏兄弟*
賬面獲利（億元）：1.96
持有新股：合景泰富及復星
劉鑾雄
賬面獲利（億元）：1.78
持有新股：復星及恒鼎
潘廸生
賬面獲利（億元）：1.25
持有新股：銀泰百貨、九興控股及復星
註：截至上周五收市價計；
*郭炳江以個人名義持有合景泰富