港股日日升，股民賺到笑，但910林大就喺《香港討論區》呻，炒股賺錢都冇用，女友一樣話佢冇大志。唔好以為佢賺得嗰一千幾百噃，佢「中三畢業，做咗文員十幾年，儲到廿幾萬，3年幾前開始炒股，𠵱家都有200幾萬，算唔錯啦！但仲係俾女朋友同佢屋企人嫌我冇大志，做個文員仔又不思上進，成日話炒股發達，唔似得人哋做律師、會計師，一個月賺幾萬蚊。」
勤力冇用要食腦
正如佢話，炒到200幾萬有啲靠運氣，但呢幾年睇咗超過200本投資書，唔少過50本心理學書、成功學等，都係希望喺股場中突圍。
siewsee0000即刻問：「廿幾萬點變200幾萬？」910林大過招，「股市每跌10%就入市，包你發！」
sirpoon就力撐：「世界變嘞，勤力冇用，最緊要食腦，以前話炒股冇用，𠵱家炒股會發達。聽日開始炒，瞓身炒，炒埋老細。」smartfrankie話：「有錢最實際，搵到係叻仔，能繼續增值係聰明仔。」disgust.com.hk覺得：「做好風險管理就得，股災蝕錢都賺得多過冇買股票嘅人，有大志又未必賺到錢。」
有人撐，當然有人「柴」，johnnyC話：「近幾年賺得多未必係你叻，而係時勢做英雄，萬一股災，嗰時你可能輸咗20至50%，咁你學歷又唔高，好大機會失業。」kikoli好言相勸：「攞啲錢進修，搵過份好啲嘅工。炒股賺錢唔穩定，今年賺咗，個市唔好就嘔番出嚟。」