以下對話屬實，時為2007年9月28日，天水圍至港島之969巴士內發生。
女：老公，快啲打電話訂飛睇《色，戒》啦，人哋攞咗威尼斯金獅獎㗎……
男：黐九線咩，威尼斯？報紙都有得你睇啦，緬甸暴動咁場面，人哋話等半日都上唔到房，仲去澳門，儍㗎？
女：好心你聽清楚啲啦，我話係李安套新戲《色，戒》，喺威尼斯又攞咗獎，成日都唔知聽乜。
男：咩話？嗰個李安又攞獎，真係黑幕，啲評判買通咗咩，又攞獎？佢啲戲啊吟吟噚噚講多過做，邊度係戲嚟㗎！
女：唔係戲又攞金像獎，仲係奧斯卡嗰隻。
男：超，DelayNoMore，乜嘢奧斯卡啫，連牛仔搞基都得獎，離輪晒譜，啲牛仔嚟㗎嘛，點會搞基啫？都唔知佢係唔係基佬嚟嘅啫。
女：得啦得啦，你嘅見解先至係正確，得未？人哋楊凡套戲都講差佬搞基啦。
男：離輪譜，差佬點會搞基？容乜易消防員都搞埋，咩嘢世界嚟㗎？家陣，啲電影節評判都唔知係乜嘢人嚟㗎。
女：唔理點，我一定要睇《色，戒》，咁大個獎，中國人攞嗰喎，一定要撐。
男：蝦！中國人嚟嘅咩，唔係台灣人咩？
女：咁台灣人係唔係中國人先？李安個老豆係標準江西人，話唔定係我哋客家人。
男：咁佢又係幾威嘅，攞咁多獎，就算內容搞基都算係咁上下囉。
女：邊度有成日搞基啫，套《臥虎藏龍》都唔知幾威武，重係發哥做主角，不知幾好睇，一樣攞過奧斯卡金像獎，重係中國武俠片第一套攞奧斯卡，唔知幾爭氣！
男：係啦，係啦，咁嗰套《喜宴》呢，唔係又搞基？
女：咁《推手》、《飲食男女》唔係，報紙日日賣到行晒，話呢套《色，戒》係三級中嘅三級，十八歲以下唔准入場㖭，連梁朝偉都正面全裸，都咪話唔犀利。
男：係囉，偉仔做乜鬼啫，幾廿歲仲全裸拍牀上戲，之前同張國榮套戲搞基都夠犀利啦，呢次又玩色情？好彩今次對手係女人。
女：女人又點啫？死佬，有女昅就睇啦咩，不過期望唔好太大，聽講女主角湯唯舊時做模特兒，嗰對胸好飛機場㗎咋，唔理點，我一定要睇就係。