華華覺得，近年中資乃至國企、民企高層，普遍嚟講都好積極吸收同改進管理經驗，事關加入世貿等於引進國際競爭，改慢啲都恐防唔夠人爭，幾年間，公司管治同透明度都提高晒，反而香港公司喺呢方面進步就好緩慢。
點解咁講？好多國企唔單止經已公佈月度營運數據，中石油（857）、中石化（386）、中海油（883）同中信泰富（267），更加連業績記者會同分析員會議都上埋網，任投資者同股東聽，華創（291）、中移動（941）甚至早已自願公布季度業績。
上個禮拜，華華同中信泰富董事總經理笵鴻齡傾開，佢哋經已做咗8分，何不做多2分，既然喺股東會都有即時傳譯，何不連分析員會議都分為英文、廣東話同國語頻道，任投資者同股東揀，咁樣同股東溝通咪可以做得更好囉！笵生當時即刻答應會番去同同事傾吓做唔做得到。華華諗住呢句係禮貌回應，點知佢第二日就覆番華華，話應該冇問題，下次業績就投資者同股東就可以有得揀，效率咁高，唔讚都唔得。
其實，唔單止中資公司，其他公司都可以考慮吓用咩方法增加透明度，事關資金自由行開閘後，內地股民都希望了解香港的上市公司，佢哋好多人已習慣上網睇資料，網站功課做好啲，日後獲得佢哋青睞嘅機會都大啲。