香港人被指崇尚物質主義，做事功利，與人交往注重外表不顧內涵，大公司內「cheap精」同事比比皆是，表面上身光頸靚出手闊綽，實際上小家又孤寒，網民「我係QQ」身邊就有一位同事，表面上包裝自己成個「上等人」，實際上凡事斤斤計較，於是上網揭開其「超豪實錄」。
「呢位上等同事閒時最鍾意話自己幾有錢，使錢有幾豪！」網民我係QQ對上等同事經常「得把口」非常不滿，尤其是她經常自稱豪爽，實際上卻愛貪小便宜。
簽卡追同事５毫貼士
「幾個同事出去食飯，由佢簽卡畀錢（因為有獎抽），個個已經即場夾番錢，點知收工前收到佢通知，話每人要收番5毫子，因為唔記得咗計貼士喎！」
此外，上等同事還自私自利，非常無品。「同事拎咗盒餅亁返嚟（有三隻味），佢竟然拎晒自己鍾意食嗰隻味，剩番另外兩隻味畀同事食。」
我係QQ將上等同事的所謂超豪實錄公開後，網民kiki3864形容：「你同事應該有病，妄想症加自大狂！」網民米高奧雲則稱：「佢係典型孤寒縮骨友。」
孤寒縮骨7招實錄
1.一味靠黐
返工無論零食、handcream、洗潔精、煙仔、香口膠一律「黐」同事
2.又食又拎
同事去完旅行買手信返公司，必定勁食之餘，還會帶返屋企享用
3.詐儍扮懵
大家夾錢買食物，必定詐儍不出錢，到自己出錢時卻斤斤計較
4.諸多要求
每遇同事外遊必提出「水蛇春咁長」的名單要求購買，並指定手信食品
5.經常晒命
在辦公室突然「嘩嘩聲」吸引同事注目，然後說：「你睇吓我隻戒指，嘩！真係好閃呀！」
6.扮着名牌
自己去花園街買幾十蚊件衫，死都話係日本或韓國貨
7.孤寒成性
用牙籤當匙羮分一點點柚子蜜給同事冲水飲
http://www14.discuss.com.hk/viewthread.php?tid=5423700&extra=page%3D2