家陣好多新股都有富豪認頭，散戶對富豪抽新股可謂又愛又恨，一來多富豪認購自然多人跟，不過，散戶冇富豪咁叠水，分得少自然覺得啲富豪同佢哋爭飯食。好似hk007d就怨啲富豪：「成日同我哋搶貨。」
不過，怨還怨，散戶都精甩尾，唔係個個富豪抽新股佢哋都死跟，喺網民界，一早已經認定邊個富豪跟得過，邊個跟佢就弊傢伙！好似大劉有份入股恒鼎，japan912喺《香港討論區》就好驚咁話：「劉鑾雄？大鑊，佢係1888（建滔積層板）及2383（TOM集團）嘅好partner（呢兩隻股都潛咗水）。」不過華華翻查資料，大劉冇認購過TOM仔喎，呢位股民似乎搞錯咗，不過，japan912寧可信其有，留下四字箴言：「前車可鑑。」
「鑑」完「前車」就梗係順勢測吓後勢吉凶，所以有網友估四叔入飛嘅波司登（3998）是吉是凶，大多數網友對四叔都好buy，六成幾網友投票話香港股神會保持不敗神話，只有近四成人話佢會老貓燒鬚。