近日爸爸不斷催促敏妮教佢上網，原因係初戰股市就有斬獲，令佢信心大增之餘，更嫌股票機報價唔夠網上即時報價方便，敏妮開始為佢沉迷投機炒賣而有啲擔心。其實，要喺旺市賺錢並唔難，最慘係貪勝不知輸，經唔起跌市風浪。
星期日同個前輩傾開股票投資嘅問題，佢係穩陣派，買股票講技術分析，更注重基本分析，佢仲用養兒育女嚟比喻投資股票，聽落好過癮，敏妮即管同大家分享吓。
佢話買股票就好似養兒育女，嗰啲生個仔出嚟唔教、唔理，想個仔好都幾難，就好似嗰啲淨係識聽冧巴炒股嘅人，想買到好股都幾難。投資一定要做功課，首先第一樣要學睇年報，「係咁意」都起吓間公司個底吖嘛！
要知個仔嘅收支
睇年報，首先睇佢有冇錢賺，就好似你個仔出嚟做嘢，賺唔到乜嘢錢，個個月入不敷支，你都會問吓佢發生乜嘢事。要知公司有冇錢賺睇損益表，若果間公司年年虧損，你都應該質疑吓佢搞邊科。最好睇埋現金流量表，因為真金白銀有錢入，同埋流入嘅錢多過流出嘅、即係有錢剩先係最重要。
另一項要睇係派息，同樣喺損益表有。咁多年供書教學，都會諗個仔出嚟做嘢，多多少少都會表示吓心意，如果佢年年賺大錢都唔派息，「呢個仔，好忤逆噃。」至於嗰啲賺得唔多，但又派高息嘅，作為父母都好擔心，究竟佢搞乜鬼。
仲有一樣好重要嘅，就係睇吓你個仔嘅理財情況，係咪洗腳唔抹腳，搞到欠落人哋周身債。睇公司資產負債表，如果公司債台高築，利息支出會好大，蠶食盈利。好幾年前新世界發展（017）同麗新發展（488），好大程度都係因為負債高，令股價升唔起。
http://manlitalk.com/blogs/