新股排隊上市，隻隻都帶挈散戶賺到笑，偏偏隻大成糖業（3889）有頭威冇尾陣，淨係第一日上市升過去2.5蚊，比招股價升23%，之後表現就好失禮。嗱，散戶唔會輸錢就賴地硬，不過，就搵過第二樣嚟賴，tmchu007話：「人人飲嘢都走甜，咁使咩買咁多糖。」
Levitra亦話：「𠵱家興飲無糖汽水。」wing780921附和：「我飲嘢都要少咗糖啦。」
rally分析：「原材料越嚟越貴，但反映唔到去大成糖業嘅產品度，毛利越嚟越少。」FuluFulu睇法一樣，「𠵱家有好多農民都將甘蔗、玉米去造生物乙醇，搞到原材料供應少咗，咪加價囉，所以冇人睇好大成糖業。」
金榜往績差
keekeung話：「我2.17蚊走，但減手續費等於白做，益咗經紀。」不肖子仲未放，「唉，我希望佢升番少少，等我唔使蝕就算啦。」
有網友就話係保薦人嘅錯，仲貼咗篇報道，指06年下半年至今，金榜保薦過嘅三間公司，其中永保時（474）同阜豐（546）上市後股價都走晒樣。
bearson以受害人身份話：「中過金榜招，想我再抽佢保薦嘅股都難。」