噚日氣溫高達30幾度，工聯會議員嫻姐以啓德發展民間聯席牽頭人嘅身份出席活動，爭取唔好將摩士一號公園對出嘅啓德明渠填平覆蓋，因為佢支持另一個方案，就係效法南韓首爾條清溪川咁，將條明渠改建成啓德河，畀啲市民可以喺河邊散步活動。
不過，黃大仙區議會早排討論呢個議題時，民建聯嘅代表已經表明支持填咗條明渠，政府最快可以喺2010年動工，明渠從此消失。雖然大家都係左派中人，但嫻姐話香港係共容社會，可以有唔同聲音，因此冇嬲民建聯嘅區議員。但佢唔會就咁死心，依然相信條明渠仲有得救，因為好多嘢可以靠民意去改變，仲話相信林鄭都肯聽喎。